Jańa álipbıge kóshý Qazaqstan úshin aıqyn baǵyt - professor Telebaev

ASTANA. QazAqparat - Latyn qarpine kóshý úrdisi durys qadam ekenin túsinip otyrmyz. Bul týraly QR Tuńǵysh Prezıdenti - Elbasynyń kitaphanasynyń Áleýmettik-aǵartýshylyq jobalar qyzmetiniń jetekshi ǵylymı qyzmetkeri, professor Ǵazız Telebaev málim etti, dep habarlaıdy QazAqparat.

«Rýhanı jańǵyrý árbir azamatqa qatysty. Osy rette jastardyń sanasynyń jańǵyrýy óte mańyzdy dep esepteımin. Sonymen qatar Prezıdent osy sanany ózgertetin qandaı naqty sharalar iske asyrylýy kerektigin aıqyndady. Bul turǵyda alty úlken joba usynylǵanyn bilesizder. Endi berilgen tapsyrmalarǵa qatysty Úkimet tıisti qadamdarǵa kirisedi. Alty tapsyrmany oryndaýda bizdiń kitaphana da óz úlesin qosatyn bolady», - dep toqtaldy Telebaev «QazAqparatqa» bergen suhbatynda.

Osy oraıda Elbasynyń latyn álipbıine kóshýdiń naqty kestesin ázirleý tapsyrmasyna toqtalǵan ol, «Birinshiden, latyn qarpine kóshý arqyly túrki elderimen jaqyndaı túsemiz. Tek qana saıası, ekonomıkalyq turǵydan ǵana emes, sonymen qatar rýhanı jaǵynan da bir álemde bolamyz. Túrki álemine jaqyndaýdan biz utylmaıtynymyz anyq. Óıtkeni túrki halyqtarymen tilimiz, dinimiz jáne mádenıetimiz bir. Sol sebepten bul durys úrdis degen oıdamyn», - dedi.

Ǵalymnyń paıymynsha, Qazaqstan halqy zamanaýı álipbıdi qoldanýy tıis. Latyn qarpi arqyly zamanaýı úrdisterden keıin qalmaýǵa múmkindik bolady.

Aıta keteıik, QR Prezıdenti Nursultan Nazarbaev «Egemen Qazaqstan» gazetine shyqqan maqalasynda latyn álipbıine kóshýdiń naqty kestesin ázirleýdi tapsyrǵan bolatyn. Elbasy 2017 jyldyń aıaǵyna deıin ǵalymdardyń kómegimen, barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerektigin de jetkizdi. Al 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisken durys dep sanaıdy.