Jańa áleýmettik kómek: Bir kúnde 11 myń adam ótinish berdi

NUR-SULTAN. QazAqparat - Jańartylǵan AÁK alýǵa ótinish qabyldaýdyń alǵashqy kúni 18 myńnan astam adam keńes alýǵa júgingen. Bul týraly QazAqparat Eńbek jáne áleýmettik qorǵaý mınıstrliginiń baspasóz qyzmetine silteme jasap habarlaıdy.

Aǵymdaǵy jyldyń 1 sáýirinen bastap Elbasynyń «Áleýmettik qamqorlyq» áleýmettik sharalaryn júzege asyrý aıasynda jańartylǵan ataýly áleýmettik kómek alýǵa qujattardy qabyldaý bastaldy.

AÁK taǵaıyndaý týraly ótinishter jumyspen qamtý jáne halyqqa qyzmet kórsetý ortalyqtarynda, sondaı-aq aýyldyq ákimdikterde qabyldanýda.

«Birinshi kúni ataýly áleýmettik kómek taǵaıyndaý máseleleri boıynsha keńes alýǵa 18 137 adam júgingen, onyń ishinde 11 220 adam tıisti ótinish berdi. Ótinish bildirgenderdiń basym bóligi Almaty oblysynda - 2712, Qaraǵandy oblysynda - 2086, Túrkistan oblysynda - 1800 tirkeldi. Adamdar eń az júgingen Mańǵystaý oblysynda - 70 adam».

Budan basqa, jergilikti atqarýshy organdar 40 805 otbasynyń derekterin jańartty, olarǵa buryn taǵaıyndalǵan AÁK qaıta esepteý júrgiziledi.

Qazaqstan Respýblıkasynyń Tuńǵysh Prezıdenti - Elbasynyń tapsyrmalaryn sapaly oryndaýdy qamtamasyz etý maqsatynda QR Eńbek jáne halyqty áleýmettik qorǵaý mınıstrliginiń qyzmetkerleri AÁK taǵaıyndaý jáne tóleý boıynsha keńes berýge óńirlerge bardy.

Sonymen qatar, Qazaqstan Respýblıkasy Eńbek jáne halyqty áleýmettik qorǵaý mınıstrligi ataýly áleýmettik kómek júgingen aıdan bastap taǵaıyndalatynyn jáne ótinish berý kúnine táýeldi emes ekenin eske salady.