Jańa Ákimshilik is-júrgizý kodeksi quqyqtyq daýlardy jarııa túrde sheshýdiń qaǵıdatty túrdegi jańa tetigi bolady - Q. Mámı

ASTANA. QazAqparat - QR Joǵarǵy soty daıyndap jatqan jańa Ákimshilik is-júrgizý kodeksi qarsylastarymen ózara baılanystaǵy memlekettik organnyń qysym jasaýshylyq jolyn kesedi. Bul týraly búgin «Ádil sot júıesi jáne ornyqty zańnama - tartymdy ınvestıtsııalyq klımattyń kepili» atty dóńgelek ústel barysynda QR Joǵarǵy Sotynyń tóraǵasy Qaırat Mámı málim etti.

Joǵarǵy Sot tóraǵasynyń aıtýynsha, qazirgi tańda jańa zańnamalyq reformalar aıasynda menshik ınstıtýttaryn sot arqyly qorǵaýdy kúsheıtýdiń birqatar sharalary usynylyp otyr. Bundaı bastamanyń bir parasy jaqynda ǵana Parlamentte tanystyrylymy ótken Azamattyq is-júrgizý kodeksiniń jobasynda kórinis tapqan.

«Tutastaı alǵanda jańa Azamattyq is-júrgizý kodeksin biz pragmatıkalyq jáne ymyralasý qadamyna júgine otyryp, sottardyń da, basqa taraptardyń da ádil sot sheshimin shyǵarýymen, ádil tórelikti qalpyna keltirýimen baılanystyramyz. Sonymen birge, Joǵarǵy sot qabyrǵasynda jańa Ákimshilik is-júrgizý kodeksiniń jobasyn ázirleý jumystary júrip jatyr. Jańa Ákimshilik is-júrgizý kodeksi quqyqtyq daýlardy jarııa túrde sheshýdiń qaǵıdatty túrdegi jańa tetigi bolyp tabylady», - dedi Q. Mámı. Onyń sózine qaraǵanda, bundaı qadam qarsylastarymen ózara árekettestik barysyndaǵy memelkettik organdardyń qysym jasaýshylyq jolyn kesedi.