«Jańa Adamdardyń» aktsııasynan keıin «Shabyttyń» shatyry jóndeletin boldy

ASTANA. QazAqparat – Mádenıet jáne sport mınıstrligi Qazaq ulttyq óner ýnıversıtetiniń ǵımaratyn jóndeýge qosymsha 530 mıllıon teńgeden astam qarajat bólýi múmkin, dep habarlaıdy QazAqparat tilshisi.

Buǵan deıin «Jańa Adamdar» jastar qozǵalysy Qazaq ulttyq óner ýnıversıtetiniń ǵımaratynyń shatyryndaǵy aqaýdy ájýalap, birneshe aktsııa ótkizgenin jazǵan edik.

Sol aktsııalarǵa Mádenıe jáne sport mınıstrligi nazar aýdaryp, máseleni sheshýge kirisken.

«Búgin bizge qoǵamdyq naýqannyń arqasynda másele sheshimin tabýǵa bet alǵany belgili boldy. Mádenıet mınıstrligi jaqyn arada QazUÓÝ ǵımaratyn jóndeý jáne qaıta jańartý úshin qosymsha 530 mıllıonnan astam qarajat bóletin bolady.

Endi Shabyt stýdentteri jaıly jaǵdaıda bilim ala alady. Bul aqparattyń resmı rastalýyn kútemiz jáne taǵy bir azamattyq naýqanymyzdyń sátti aıaqtalýyn atap ótýge daıyndalyp jatyrmyz. Bizge qıyn jaǵdaıda kómektesken árbir qazaqstandyqqa, Shabyt máselesi týraly aqparatty áleýmettik jelilerde qoldap, taratqandardyń barlyǵyna shyn júrekten alǵys aıtamyz. Nátıjege birge qol jetkize alamyz», - deıdi qozǵalys belsendisi Álıhan Sársenov.