«Jańa Adamdar» kópshilik aldynda orynsyz sóılegen tanymal tulǵalardy synady
«Kúlki – kúndelikti kúızelisterdiń kesirinen týyndaıtyn kerneýdi joıýǵa jáne demalýǵa kómektesetin keremet antıdepressant. Stendaperler men komıkter óz ázilderimen bizdi jıi kúldiredi. Alaıda sońǵy ýaqytta qoǵam qaıratkerleri, depýtattar men kópshilikke tanymal tulǵalar ıýmorıstterdiń jumysyn atqara bastaǵandaı», - deıdi belsendiler.
Olardyń sózinshe, qymbat kostıýmdegi salmaqty adamdar ózekti máseleler jaıly óz pikirlerin aıtyp, qoǵamnyń aldynda saıqymazaqqa aınalyp jatyr.
«Jańa Adamdar mundaı «ártisterdi» «Absýrd attraktsıonynda» jarııalap, jurtty kúldirgen bolatyn. Kez kelgen adam aınalmaly blok túrindegi «nysanǵa» arnaıy jármeńkelik dopty atyp, áıgili tulǵanyń aqylǵa syımaıtyn dáıeksózin kóre alǵan. Bul sózderdi kópshilik aldynda eresek adamdar aıtqan. Aıtylǵan sózderdiń avtorlary mańyzdy bir taqyrypty talqylaǵandaryna nemese belgili bir máseleniń sheshilýi boıynsha tıimdi keńes bergenderine óte senimdi. Alaıda olardyń búkil sózi kúlkiden basqa emotsııalardy shaqyra almaıtyny anyq», - delingen habarlamada.
Belsendiler atalǵan taqyrypqa qatysty birneshe mysal da keltirgen.
«Ózderińiz qarańyzdar, jýrnalıst Merýert Áıtenova baqytsyz nekege ushyraǵan jandar týraly: «Men ajyrasqan áıelderdi jek kóremin, olardyń qasynda tipti otyrǵym da kelmeıdi» dep aıtqan. Taǵy bir mysal. Burynǵy depýtat Edil Jańbyrshın: «Qazaqtarda, erkek bar jerde, áıeldiń sóz aıtýǵa quqyǵy joq» dep Qazaqstan saıasatyndaǵy genderlik teńdik týraly osyndaı pikirin qaldyrǵan. Pavlodardyń qalalyq máslıhatynyń depýtaty, Gúljaına Darımova turmysy nashar otbasylarda tárbıelenetin balalar týraly: «Osy balalar keshke jaqyn úıde bolyp-bolmaǵanyn tekserý kerek nemese olardyń mekenjaıyn bilip alý úshin, denelerine chıp japsyrýǵa bolady. Men bolsam, osy balalarǵa chıp ornatyp qoıar edim» degen usynyspen bólisken. Biraz ýaqyttan keıin de, osy «komıkterdiń» eshqaısysy aqylǵa qonymsyz sózderi úshin keshirim suramaı, buny tipti moıyndaýǵa qulqy joq. Eń qorqynyshtysy, osy atap ótilgen jáne basqa da kóptegen qoǵam qaıratkerleri, «Absýrd attraktsıonyna» jetkizgen kózqarastaryn ustanyp, mańyzdy memlekettik jáne qoǵamdyq isterdi júrgizýdi jalǵastyryp jatyr», - deıdi belsendiler.
Jańa Adamdar memlekettegi búkil qoǵam qaıratkerlerine qandaı da bir dúnıeni jarııalamas buryn, úsh ret oılaýǵa keńes berdi. Óıtkeni osy tulǵalardyń sózderi men sheshimderi qarapaıym adamdardyń ómirine tikeleı áser etedi.