Jańa 20 myń teńgeni shyǵarý shyǵyny qandaı

NUR-SULTAN. QazAqparat - Qazaqstan Táýelsizdiginiń 30 jyldyǵyna arnalǵan nomınaly 20 000 teńgelik mereıtoılyq banknottyń shyǵyny basqa banknottarǵa jumsalǵan shyǵystarmen birdeı. Bul týraly QR Ulttyq bankinen málim etti, dep habarlaıdy QazAqparat tilshisi.

«Bul banknotty shyǵarýǵa jumsalǵan shyǵyndar basqa banknottarǵa jumsalǵan shyǵystarmen salystyrmaly túrde birdeı. Quny boıynsha aıyrmashylyqtar joq. Shyǵyndardyń negizgi úlesi materıaldar men jumystardy satyp alýǵa, atap aıtqanda, banknotqa beıneler men qorǵanysh elementterin qoldanýǵa jumsaldy. Banknottyń dızaınyn Ulttyq bank mamandary ázirledi. Banknottar men monetalardy shyǵarý boıynsha shyǵystar Ulttyq banktiń saıtynda jyl saıyn jarııalanatyn shoǵyrlandyrylǵan qarjylyq jyldyq esepte kórsetiledi», - delingen taratylǵan aqpartta.

Ulttyq bank málimetinshe, banknottar ekinshi deńgeıdegi bankter (EDB) jáne «Qazposhta» AQ arqyly aınalysqa túsedi. Banknottardy aýmaqtyq fılıaldarǵa jetkizýge, EDB-nyń qolma-qol aqsha alýǵa jáne taǵy basqalarǵa arnalǵan ótinimderine baılanysty belgili bir rásimdik sátter bar. Aldyn ala derekter boıynsha, banknottar 2021 jylǵy jeltoqsannyń birinshi onkúndiginde aınalysqa shyǵady.

Mereıtoılyq banknot jańartylǵan dızaınǵa jáne ınnovatsııalyq qorǵanysh elementterine ıe bolǵandyqtan, EDB-ǵa jáne bıznes sýbektilerine banknottardy qabyldaý jáne berý úshin avtomatty qurylǵylardy beıimdeý jáne kúıge keltirý úshin belgili bir ýaqyt (4 aıdan 6 aıǵa deıin) qajet bolady.

Buǵan deıin Elbasy sýreti beınelengen jańa 20 myń teńge aınalymǵa shyǵatynyn habarlaǵan edik.