Jan Kosobýtskııdiń WBC tıtýly úshin aıqasynyń datasy jarııalandy

NUR-SULTAN. QazAqparat – Kásipqoı rıngte jeńilip kórmegen sýperaýyr salmaqtaǵy qazaqstandyq boksshy Jan Kosobýtskııdiń (17-0, 16KO) frantsýz Joan Dıýopaǵa (39-6, 26KO) qarsy jekpe-jeginiń datasy naqtylandy. QazAqparat bul týraly VKontakte áleýmettik jelisindegi «Qazaqstannyń kásipqoı boksy» paraqshasyna silteme jasap habarlaıdy.

«Universum-Box Promotions promoýterlik kompanııasynyń aqparatyna sáıkes, jekpe-jek 21 mamyr kúni Germanııanyń Gambýrg qalasynda ótedi», - delingen paraqshada.

Bastapqyda aıqas atalǵan qalada aqpan aıynda ótýi tıis bolǵan. Báske tigilgen tıtýl – sýperaýyr salmaqtaǵy WBC International chempıonynyń vakantty beldigi. Alaıda Kosobýtskııdiń komandasynda koronavırýs anyqtalǵandyqtan, jekpe-jek keıinge shegerildi.

Bul Jan Kosobýtskıı úshin 2022 jyldaǵy alǵashqy aıqas bolady. Buǵan deıin ol (2021 jyldyń qarashasy) Domınıkan Respýblıkasynyń ókili Aleksıs Garsııany (11-1, 7KO) besinshi raýndta nokaýtqa jibergen edi.
⠀