Jan berip, jan alysqan aıqasty baqylaımyz – FIDE basshysy álem chempıony ataǵy úshin match jaıynda

ASTANA. QazAqparat – Halyqaralyq shahmat federatsııasynyń prezıdenti Arkadıı Dvorkovıch Dın Lıjen men ıAn Nepomnıaşıı arasyndaǵy shahmattan álem chempıony ataǵy úshin sheshýshi matchqa oraı pikir bildirdi, dep habarlaıdy QazAqparat tilshisi.

«Dın Lıjen men ıAn Nepomnıaşıı arasyndaǵy kúrestiń qyzýy shahmat jankúılerleriniń eshqaısysyn beı-jaı qaldyrmaıdy. Biz jan berip, jan alysqan soqqy almasýdy baqylaıtyn bolamyz. Eki sportshy da eń joǵary laýazym, óz ómirlerindegi eń úlken armandary úshin kúresedi. Árbir partııa mıllıondaǵan jankúıerdiń tańqalarlyq qyzyǵýshylyǵyn týdyrady», - dedi FIDE prezıdenti elordadaǵy Shahmatshylar saıabaǵyna aǵash otyrǵyzý rásimi barysynda.

Arkadıı Dvorkovıch básekelester arasynda teń oıynnyń bolatyndyǵy anyq bolǵanyn atap ótti.

«Kúres teńdeı jaǵdaıda bolatyndyǵyn kúttim. Óıtkeni, ár básekelestiń myqty tusy bar. Olar - álem reıtınginde 2 jáne 3-orynda turǵan sportshylar. Nátıjeli partııalar sany da kútkendeı boldy. Bul - sport. Árbir qatelikten keıin jan alyp, jan berisken kúres bolady. Jáne de bul shahmat jankúıerlerine unaıdy», - dedi ol.

Esterińizge sala ketsek, elordada ótip jatqan shahmattan álem chempıonatynda Dın Lıjen men ıAn Nepomnıaşıts 14-partııada teń túsken edi. Búgin álem chempıony eki sportshy arasynda ótetin taı-breık barysynda anyqtalady.