Jambyldyqtar qaza tapqan «Halyq qaharmany» Meıirjan Aımanovty aqtyq saparǵa shyǵaryp saldy

TARAZ. QazAqparat - Jambyl oblysynda jarylystan qaza tapqan azamattyq qorǵaý polkovnıgi Meıirjan Aımanovty sońǵy saparǵa shyǵaryp saldy, dep habarlaıdy QazAqparat «Habar-24» telearnasyna silteme jasap.

Órt sóndirýshi áskerı qoımadaǵy qyzyl jalyndy aýyzdyqtaý kezinde bolǵan, joıqyn jarylystan qaza tapqan. Onyń artynda ata-anasy, ańyrap 5 balasy, aıaýly jary, baýyrlary qaldy.

Meıirjan – Aımanovtar áýletiniń úlkeni bolatyn. Tuńǵysh ul bolǵandyqtan ata-anasy da, baýyrlary da oǵan arqa súıeıtin. Ol da aǵaıyn men týysqa, dos pen baýyrǵa árdaıym qushaǵyn ashyp, kómegin aıamaıtyn.

«Oryndalmaǵan armandary kóp edi. Tym erte ketti. Janymdy aıtqyzbaı uǵatyn qulynym edi» deıdi etegi jasqa tolǵan anasy Aıtkúl Aımanova.

«Jetige qaraı men onymen habarlastym. «Balam, jumysyń bitti me? Qaıdasyń? - dep edim «Mama, órt sóndirýge ketip baramyn» dedi. Ol jarylys bolatynyn bilgen de joq. Órtti sóndire bastaǵan kezde jarylǵan ǵoı. Balalardyń bári ushyp-ushyp ketti. Ol 1-2 balany qutqarypty. Ózi qaıtadan qalǵan balalarǵa kirip ketipti. Sodan shyqpady ǵoı», - dedi Aıtkúl Aımanova.

Meıirjan jaqynda ǵana 45 jasqa tolǵan edi. Ómir boıy órt sóndirý salasynda eńbek etip, polkovnık shenine deıin ósti.

«Adaldyq pen ádildikti jany qalaıtyn. Álsizge qamqor, jalǵandyqqa jany qas bolatyn. Kishkentaıynan sportty serik etti» deıdi taı-qulyndaı tebisip, birge ósken synyptas dostary.

«Meıirjandy kishkentaıynan bilemiz, sol kezde boıynda qaırat bar edi. Álsizderge jaqtasyp, qorǵap júretin edi. Tóbemizden jaı túskendeı bop otyrmyz. «Endi ómir súrip, bala-shaǵany ósirip, qyzyǵyn kóremin ba» degende qyrshynynan ketip otyr», - deıdi MeıirjanAımanovtyń synyptasy Elmıra Іzmaǵambetova.

Eske sala ketsek, 29 tamyzda QR Prezıdenti Qasym-Jomart Toqaevtyń Jarlyǵymen Meıirjan Aımanovqa «Halyq qaharmany» ataǵy berildi.