Jambyldyqtar 12 tonna qoqys shyǵardy

TARAZ. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstrligi «Birge – Taza Qazaqstan» ekologııalyq aktsııasyna qoldaý bildirip, respýblıkamyzdyń ár aımaǵynda tazalyq sharalaryn ótkizdi.

Respýblıkalyq chellendjge mınıstrlikke qarasty Jambyl oblysyndaǵy «Azamattarǵa arnalǵan úkimet» memlekettik korporatsııasy, «Zerde» AQ, «Ulttyq aqparattyq tehnologııalar» AQ, «Qazposhta» AQ men «Qazaqtelekom» AQ qyzmetkerleri qatysty, dep habarlaıdy QazAqparat tilshisi.

Jalpy respýblıkalyq deńgeıde ótip jatqan aktsııa qorshaǵan ortany qoqystan tazartyp, elimizdiń ekologııalyq jaǵdaıyn jaqsartýǵa baǵyttalǵan.

«Azamattarǵa arnalǵan úkimet» memlekettik korporatsııasy» KE AQ Jambyl oblysy boıynsha fılıal dırektory Qystaýbaı Saǵyntaevtyń aıtýynsha, mańyzdy ekologııalyq sharany memlekettik korporatsııanyń barlyq aımaqtaǵy fılıaldary men mınıstrlikke qarasty mekemeler qoldap, barynsha belsendi túrde atsalysqan.

«Búgin biz áriptesterimizben Seıfýllın-Qonaev kósheleriniń qıylysynda ornalasqan alleıany tazartýdamyz. Qyzmetkerlerimiz týǵan jerdi kórkeıtýge ózindik úles qosyp jatyr. Ǵasyrlar boıy ydyramaıtyn plastık sııaqty qoqysty jınaý – óte mańyzdy. Óńir turǵyndaryn osyndaı tazalyq aktsııasyn qoldaýǵa ǵana emes, aınalany taza ustap qaldyqtardy tastamaýǵa shaqyramyn», – dep atap ótti dırektor.

Aıta keteıik, Jambyl oblysy boıynsha tazalyq aktsıasyna 861 qyzmetker jumyldyryldy. Olar birlesip, 12 tonna qoqys shyǵardy.