Jambyldyq úsheý Qaraǵandyǵa 200 kg jýyq marıhýana ákep satpaq bolǵan

QARAǴANDY. QazAqparat – Qaraǵandy oblysynyń polıtsııa qyzmetkerleri esirtkiniń iri partııasyn jetkizýshilerdiń jolyn kesý maqsatynda arnaıy shara ótkizdi. Operatsııa barysynda 198 kg marıhýana jáne 6 mln teńgeden astam aqsha tárkilendi, dep habarlaıdy QazAqparat tilshisi.

Qaraǵandy oblysy PD esirtki qylmysyna qarsy is-qımyl basqarmasynyń qyzmetkerleri Jambyl oblysynyń úsh turǵyny respýblıka óńirlerine aıtarlyqtaı kólemde esirtki jetkizýmen aınalysatynyn anyqtaǵan.

«12 maýsymda «Qarasora-2022» aýqymdy respýblıkalyq operatsııasy aıasynda jedel-tergeý sharalary kezinde esirtki tasymaldaý, saqtaý jáne ótkizý kúdigi boıynsha 34, 39 jáne 56 jastaǵy úsh er adam ustaldy. Onyń barlyǵy - Jambyl oblysynyń turǵyndary. Ustalǵandardan 6 mln 435 myń teńge qolma-qol aqsha, ósimdik tektes zat salynǵan segiz qap tárkilendi. Saraptama qorytyndysyna sáıkes, ol jalpy salmaǵy 198 kg keptirilgen marıhýana bolyp shyqty», - dep habarlady Qaraǵandy oblysy PD esirtki qylmysyna qarsy is-qımyl basqarmasynyń bastyǵy Baýyrjan Mıssalımov.

Atalǵan fakti boıynsha QR QK 297-baby 3-bóligi boıynsha qylmystyq is qozǵaldy. Tártip saqshylary tergeý júrgizip jatyr.

Sondaı-aq keshe túnde Almaty jáne Taraz qalalarynda osy toptyń 3 adamy ustaldy.

Olardan «Range Rover» jáne «Leksýs» avtomobılderi, qarý tárkilendi.