Jambyldyq tórt metsenat «Jomart júrek» syılyǵyn ıelendi
«Rýhanı jańǵyrý» baǵdarlamasynyń «Atameken» kishi baǵdarlamasy aıasynda halyqty, bıznes-qurylym ókilderin, úkimettik emes uıymdardy, volonterlerdi kishi otanyn damytýǵa yntalandyrý jáne qaıyrymdylyq qyzmet, metsenattyq pen meıirbandyq ıdeıalaryn nasıhattaý maqsatynda 2018 jyly «Jomart júrek» jobasy júzege asyrylýda.
Atalǵan joba aıasynda saltanatty quttyqtaý rásimi barlyq deńgeıde uıymdastyryldy. Saltanattyń maqsaty - halyqty, bıznes-qurylym ókilderin, metsenattardy, úkimettik emes uıymdar men volonterlerdi yntalandyrý, kótermeleý jáne kishi otanyn damytýǵa qatysýǵa ýájdemeleý, azamattardyń belsendiliginiń úzdik tájirıbesin taratý, qaıyrymdylyq qyzmet, metsenattyq pen meıirbandyq ıdeıalaryn tanymal etý.
Jambyl oblysynda bul baıqaýǵa 64 adam qatysty. Oblystyq deńgeıdegi rásim aǵymdaǵy jyldyń 16 qarashasynda «Týǵan jerge týyńdy tik» atty jerlester forýmy aıasynda ótken bolatyn. Sodan iriktelip shyqqan úzdik 5 laýreat respýblıkalyq básekege qatysty. Keshe Astana qalasynda ótken «Jomart júrek» syılyǵy laýreattaryn saltanatty quttyqtaý rásiminde jambyldyq 5 úmitkerdiń tórteýi óz nomınatsııasynda jeńiske jetti. Respýblıkalyq deńgeıde 50 laýreat marapattalsa, onyń ishinde Jambyl oblysynan 4 metsenat bar. Olar - Saırambaı Dónenbaev, Janbolat Bekmusaev, Erbolat Saýryqov jáne Aıgúl Razaqova.
«Jyl tulǵasy» nomınatsııasynda jeke kásipker, «Sháýshen» sharýa qojalyǵynyń basshysy Saırambaı Dónenbaev úzdik atandy. Saırambaı Dónenbaev T.Rysqulov aýdany Jarlysý aýylyna óz qarajaty esebinen «Murat baba» meshitin salyp, halyq ıgiligine berdi. Osy aýdanda 40 oryndyq ınternat qurylysyn júrgizip, memleket menshigine ótkizdi. Onda az qamtylǵan otbasy balalary men alys jaıylymdardaǵy shopan balalary tárbıelenýde. Sonymen qatar, 1932-1933 jyldardaǵy asharshylyq qurbandary men 1941-1945 jyldardaǵy UOS jaýyngerlerine arnalǵan saıabaq pen memorıaldy taqta salyp, ony tegin mektep balansyna ótkizdi. Qazaq handyǵynyń 550 jyldyq mereıtoıynyń aıasynda ótken at báıgesi oıyndaryna jáne aýdannyń qoryna qarjy aýdardy. T.Rysqulov aýdany Jarlysý aýylynda 92 oryndyq balabaqsha qurylysyn aıaqtap, halyq ıgiligine usyndy. Aýylda ulttyq at sporty ónerin damytýǵa da úzdiksiz qarjylaı kómek berip keledi. Ol jas kókparshylardy daıarlaýǵa qarjy bólgen.
Al «Taraz ınnovatsııalyq gýmanıtarlyq ýnıversıteti» rektory Erbolat Saýryqov «Týǵan ólke» nomınatsııasy boıynsha laýreat atandy. E.Saýryqov 2017-2018 oqý jyldarynda ýnıversıtette 12 talapkerge, onyń ishinde 9 fýtbolshy, 3 múmkindigi shekteýli azamattarǵa óziniń atynan tegin oqý grantyn berdi. Sonymen qatar, 516 stýdentke áleýmettik jeńildik qarastyryp, jáne ár jyl saıyn otbasyly stýdentterdiń balalaryna jańa jyldyq merekesinde arnaıy syılyq berý qarastyryp, qarjy bólgen. Sondaı-aq, E.Saýryqovpen jáne Moıynqum aýdanymen 5 jylǵa arnalǵan ózara kelisimshart jasalǵan. E.Saýryqov 2018 jyly Moıynqum aýdany Qumózek aýylyndaǵy Ybyraı Altynsarın atyndaǵy orta mekteptiń saıabaǵynda jóndeý jumystary júrgizýde. Sondaı-aq, osy jyly Baızaq aýdanynyń 80 jyldyq mereıtoıyn ótkizýge qarjy aýdarǵan.
«Jyl metsenaty» nomınatsııasyn «Alga Diamond» kompanııasynyń prezıdenti Janbolat Bekmusaev ıelendi. Janbolat Qarataıuly jyl saıyn Jambyl oblysy Sarysý aýdanynyń Baıqadam Qashqynbaev atyndaǵy orta mektep janyndaǵy ınternet úıiniń balalaryn kıim-keshekpen, azyq-túlikpen jáne jıhazdarmen qamtamasyz ete otyryp, kómek kórsetip keledi. 2018 jyly Saýdakent aýylynda «Strıtvorkaýt» sporttyq alańdarynyń qurylysyna demeýshilik kómek kórsetti. Jańatas qalasynda Aýǵan soǵysy ardagerleri qurmetine esteliq taqta ornatty.
«Aınalaıyn» qoǵamdyq birlestiginiń tóraıymy Aıgúl Razaqova «Eren eriktilik» nomınatsııasy boıynsha laýreat ataǵyn ıelendi.
2000 jyldary A.Razaqova óziniń páterinen ártúrli úıirme ashyp, úıirmelerge 200-den astam aýyl balalaryn qabyldady. 2004 jyly bul ortalyq tolyqqandy qoǵamdyq birlestikke aınalady. Búginde, ortalyqta «aǵylshyn tili», «horeografııa», «eriktiler klýby», «teatr», «qorshaǵan ortany qorǵaý», «fotoklýb», «kesteleý», «balalar kitaphanasy», «dızaın» úıirmeleri jumys istep tur. Jazda shaǵyn lager jumysyn bastaıdy. Sonymen qatar, qyz jasaýy, kıiz úı jasaýy, sol sıqty balalar taýarlaryn shyǵarý qolǵa alynǵan. Klýb sońǵy 8 jyl boıy qatarynan múgedek balalardyń áleýmettik qorǵalýy men qoldaýyna baǵyttalǵan «Shýaq» atty kıiz úı lagerin óz qarajatyna júrgizip keledi. Volonterlik klýbynyń maqsaty - saý balalar men múgedek balalar arasyndaǵy qarym qatynastardy nyǵaıtý. Qazirgi tańda volonterlik klýbynyń qatarynda 300-ge jýyq erikti bar, onyń ishinde múmkindigi shekteýli jastar da bar. Aıgúl Razaqova 15 jumyssyz áıeldi jumysqa ornalastyrdy. Az qamtylǵan otbasylar men múgedekterge arnalǵan 5 aýdandyq qaıyrymdylyq shara ótkizdi. Sonymen birge, 2012 jyly Razaqovanyń ortalyǵy «ıÝNESKO-nyń Klýby» sertıfıkatyna ıe boldy.
«Amazonka» qaterli isik naýqastaryn qoldaý qory» qoǵamdyq qory «Jyldyń úzdik uıymy» nomınatsııasy boıynsha jeńiske jetti. Qordyń jetekshisi - Anjelıka Sarıan. Qor «Jyljymaly hospıs» áleýmettik jobasyn júzege asyrýda. Joba emdelýshilerge keńes berý jáne emdeý, pallıatıvti kútim kórsetýge baǵyttalǵan. Ol óz uıymynyń jumysyn aýrý adamdardyń aýrýlaryn joıýǵa, báseńdetýge, emdelýshiniń psıhologııalyq, rýhanı máselelerin sheshýge jáne eriktiler tobymen birlese otyryp, pallıatıvti kómekke muqtaj jandarǵa kómek kórsetedi. Qor kúnine 10-15 úıge shaqyrtý qabyldaıdy. Emdelýshilerdi dárigerdiń qabyldaýyna, tekserilýge jáne emdeý sharalaryna jetkizedi. Búgingi kúni oblystyq onkologııalyq dıspanserde 5 myńǵa jýyq adam esepte tur. Jobanyń arqasynda qor qyzmetkerleriniń sany 23 adamǵa jetti. Jastar arasynan volonterler kelip qosyldy. Emdelýshilerdiń úılerine dáriger, medbıke, áleýmettik qyzmetker, psıholog jáne qajettigine qaraı rýhanı demeýshiler baryp turady. Medıtsınalyq jáne psıhoáleýmettik kómekten basqa da materıaldyq járdem de kórsetiledi. Osy jyly qor óz esebinen múgedektik qolarbalar, oıylyp ketýge qarsy matratstar alynyp, keıbir januıalarǵa óteýsiz tegin berildi.
Ǵıbrat Sembaı