Jambyldyq sharýalar mal qystatýǵa 1 mln 700 myń tonnaǵa jýyq shóp jınady

TARAZ. QazAqparat – Jambyldyq sharýalar qys mezgiline saqadaı-saı ázir, dep habarlaıdy QazAqparat tilshisi.

Jambyl oblysynda bıyl mal qystaýlarynda 888,6 myń bas mal qystatylady dep josparlanýda. Jalpy, oblysta 5 862 mal qystaýy bolsa, onyń 1 020-sy shalǵaıdaǵy jaıylymdarda, qumdy aımaqtarda ornalasqan.

Oblystyq aýyl sharýashylyǵy basqarmasynyń málimetine súıensek, qystaýlardaǵy malshylarǵa arnalǵan 5 564 turǵyn úı, 2 184 qotan-qashar, 936 baz tolyq jóndeýden ótkizilgen. Sonymen birge, daıyndalǵan shóptiń basym bóligi sol qystaýlardyń qasyna jınaldy. «Jyldaǵy úrdisten jańylmaı kele jatqan óńirdiń aýyl sharýashylyǵy qurlymdary bıyl da erte bastan-aq qys qamyna kiriskeni belgili. Jalpy, ótken jaz sharýalar úshin óte qolaıly bolǵandyqtan, shabyndyqtarda tabıǵı shóp mol bolyp, mal azyǵyn daıyndaý naýqany oıdaǵydaı ótken bolatyn. Óńirde mal qystatýdy qalypty ótkizý úshin bıyl 1 mıllıon 592 myń tonna pishen daıyndaý qajet bolsa, oblystaǵy barlyq sanattaǵy aýyl sharýashylyq qurylymdarynda 1 mıllıon 667 myń tonna pishen ázirlendi. Buǵan qosa aýdandarda 117,9 myń tonna saban jınalǵan»,-deıdi oblys ákimdigi aýyl sharýashylyǵy basqarmasynyń baspasóz hatshysy Tuńǵysh Januzaqov. Basqarmadaǵy mamandardyń aıtýynsha, búginde óńirimizde mal azyǵy 110-120 paıyzǵa daıyndalǵan. Biraq agroqurylymdardarǵa mal azyǵynyń sapasyna, ratsıon qurylymyn jaqsartýǵa erekshe talap qoıylýda. Qazirgi tańda joǵary surypty et, sút óndirý úshin mal ratsıonynda súrlem, pishendeme sııaqty qunarly azyqtyń úlesin arttyrý boıynsha jumystar júrgizilýde. Osy maqsatta pishennen bólek sharýashylyq sýbektilerinde 60 myń tonna súrlem, 56 myń tonna pishendeme ázirlengen. «Qystaýǵa túsetin mal sanyna qaraı sharýashylyqtarǵa 533,2 myń tonna qunarly jem qajet. Endigi jerde qunarly mal azyǵyna degen qajettilikti tolyq qamtamasyz etý úshin elimizdiń soltústik oblystarynan 100 myń tonna jem satyp alý josparlanýda»,-deıdi Tuńǵysh Januzaq. Aıta keteıik, qazirgi tańda aýyl sharýashylyǵy basqarmasynyń usynysymen aýdan ákimdikterinde mal qystatýdy ótkizý boıynsha jedel shtab qurylyp jumys isteýde. Aýdan ákiminiń orynbasary basshylyq etetin shtab mal qystatý barysynda týyndaǵan barlyq máselelerdi shuǵyl sheshýge atsalysady. Qajet bolǵan jaǵdaıda aýdandaǵy iri kásiporyndardyń rezervin, tehnıkasyn, basqa da resýrstardy utymdy paıdalanýǵa múmkindik berilgen.