Jambyldyq ónerpazdar Astananyń 20 jyldyǵyna oraı elordada gala-kontsert qoıdy

ASTANA.QazAqparat - Astana qalasynyń 20 jyldyǵyna oraı Jambyl oblysynyń mádenıet kúnderi aıasynda «Jańarǵan Jambyldan - asqaqtaǵan Astanaǵa!» atty merekelik gala-kontsert ótti, dep habarlaıdy QazAqparat tilshisi.

Elordanyń 20 jyldyq mereıtoıymen quttyqtaýǵa Jambyl oblysynan 200-ge jýyq ónerpaz keldi. Olar oblystyń mádenıet kúnderi aıasynda Astana turǵyndaryna arnap merekelik baǵdarlama usyndy.

Merekelik kontsertte bas dırıjer Adaı Jumat, «100 jańa esimniń» jeńimpazy Erlan Baqtygereı bastaǵan Qazaq ult aspaptar orkestri, Dastan Kóregenniń jetekshiligindegi «Alataý» folklorlyq ansambli, Qaırat Bolysbektiń jetekshiligindegi «Aqkerbez» bı ansambli, «Káýsar» vokaldyq ansambli, QR Mádenıet salasynyń úzdikteri Ońal Azamatova, Nazıma Úsenova, Janatbek Kádirov jáne Jandos Omarov, Torǵyn Orynbaeva, Ǵanı Mátebaev, Ásel Ýasheva, Bahrom Mýmınov, Qaısar Kókishov, Dınara Dıhanbaeva jáne t.b. dástúrli, estrada ánshileri óner kórsetti.

Shara barysynda birneshe án men kúıdiń tusaýy kesildi. Sondaı-aq qonaqtardyń nazaryna sahnalanǵan kórinis usynyldy.

«Astana - kúlli qazaqstandyqtardyń maqtanyshy, egemendigimizdiń kelbeti men aıǵaǵy. Sondyqtan, elimizdiń jarqyn bolashaǵy elordadan bastalady. Bas shahar tarıhı ólshemmen óte qysqa merzimde bıiktikpen kórkeıýge qol jetkizip, jas memlekettiń armanyn shyndyqqa aınaldyrdy. Elbasy N.Nazarbaevtyń parasatty saıasatynyń nátıjesinde qysqa merzim ishinde Astana Qazaqstannyń ǵana emes, búkil Eýrazııalyq keńistiktiń saıası, ekonomıkalyq jáne mádenı ómiriniń oshaǵyna aınaldy. Jambyl oblysynyń atynan Astananyń 20 jyldyq mereıtoıymen quttyqtaı otyryp, merekelik shashýymyzdy tartý etemiz!», -dedi Jambyl oblysy ákimdiginiń mádenıet, arhıvter jáne qujattama basqarmasynyń bastyǵy Dúısenáli Byqybaev.

Gala kontsert sońynda kórermender arasynda «Tarazdan tartý» atty utys bıleti oınatyldy.