Jambyldyq oqýshynyń jazǵan hatyna Prezıdent jaýap berdi

TARAZ. QazAqparat - Jambyl oblysy Jambyl aýdanyna qarasty Jasórken aýylyndaǵy «Móldir» balabaqsha-mektep gımnazııasynyń 2-synyp oqýshysy Jibek Isabek jýyrda el Prezıdenti Qasym-Jomart Kemeluly Toqaevqa júrekjardy tilegin jazǵan edi, dep habarlaıdy QazAqparat.

Sabaq úlgerimi jaqsy, ozat oqýshylardyń biri –Jibektiń júregi de meıirimge toly. Onyń haty Memleket basshynyń qolyna tıgen.

El Prezıdenti Jibekke jazǵan hatynda jambyldyq oqýshynyń hatyn asa rızashylyqpen oqyǵanyn aıtqan.

«Maǵan joldaǵan ystyq lebiziń úshin rahmet. Seniń erteńgi kúni úlken azamat bolyp ósip, elimizdiń parasatty perzenti atanatynyńa kámil senemin. Bizdiń búgin qolǵa alyp jatqan jumysymyzdyń barlyǵy da jarqyn bolashaǵymyzdyń ıesi – ózderińe arnalady. Sondyqtan sabaǵyńdy úzdik oqyp, ustazdaryń men anańnyń bergen tálim-tárbıesin boıyńa sińirip, maqsatqa umtylýdan jalyqpa. Otbasyńnyń qashan da maqtanyshy bolyp, jetistikterge jete ber, aınalaıyn! Anań men baýyryńa menen sálem», - degen Qasym-Jomart Kemeluly Jambyl aýdanynyń oqýshysyna noýtbýk tartý etken.

Óz kezeginde hattyń ıesin búgin oblys ákimi Berdibek Saparbaev arnaıy qabyldap, «Mundaı hatty júrekti qyz jazady» dep tańdandy.

Іzgi nıetin kórsetken Berdibek Mashbekuly Jibekke smartfon men kitap syıǵa tartty.