Jambyldyq oqýshylar ál-Farabı týraly ǵylymı jobalaryn qorǵady
Ábý Nasyr ál-Farabıdiń 1150 jyldyq mereıtoıyna oraı uıymdastyrylǵan baıqaýǵa qalalyq jáne aýdandyq irikteýlerde top jarǵan 70 oqýshy qatysyp, baqtaryn synady. Bilim báıgesi «Júırikten júırik ozar jarysqanda...», «Danyshpandyqtyń injý marjany...», «Men somdaǵan Farabı...» atty 3 nomınatsııa boıynsha ótti.
Baıqaý barysynda oqýshylar ál-Farabıdiń ómiri men shyǵarmashylyǵyna qatysty ıntellektýaldyq suraqtarǵa jaýap berip, uly oıshyldyń til, ádebıet, mýzyka, rıtorıka, fılosofııa, jaratylystaný salalaryndaǵy eńbekterine qatysty ǵylymı jobalaryn qorǵady. Odan bólek qatysýshylar ǵulamanyń ómir joly men shyǵarmashylyǵy týraly sahnalyq qoıylym qoıyp, sahna mádenıeti, kıim úlgisi, akterlik sheberlikteri boıynsha baǵalandy.
Tartysty saıys nátıjesinde І oryndy T.Rysqulov aýdanynyń komandasy jeńip alsa, júldeli ІІ oryn Jambyl jáne Merki aýdanynyń komandalaryna buıyrdy. Al, Baızaq, Talas aýdandarynyń komandasy júldeli ІІІ oryndy ıelendi.