Jambyldyq qurylysshylar Arystaǵy 6 úıdiń jóndeý jumystaryn aıaqtap úlgerdi
Arys qalasyn qalpyna keltirý boıynsha qolǵa alynǵan sharýalar aýqymdy desek, ondaǵy jambyldyq qurylysshylardyń jumyla jasap jatqan jumystary óz jemisin berýde. Nátıjesinde búgin Jambyl oblysynyń shtabyna tıesili 3-sektordaǵy 6 jeke turǵyn úıdiń jóndeý jumystary tolyǵymen aıaqtaldy.
"Qazirgi tańda 3-sektor aýmaǵynda jambyldyq 16 qurylys kompanııasynyń 220 qurylysshysy aıanbaı ter tógýde. Olar 50 jeke turǵyn úıde jóndeý jumystaryn júrgizýde. Zerdeleýden ótken jeke turǵyn úıdiń barlyǵynyń aqaý aktileri toltyrylyp, smetalaý jumystary jasalýda. Qıraǵan 3 úıdiń ekeýi boı kóterip, bireýi tolyq jańǵyrtylatyn bolady. Qalǵan úılerge kúrdeli jóndeý jumystary júrgiziledi",-deıdi Jambyl oblysy ákiminiń keńesshisi Birjan Sóktaı shtab jumysynan xabar berip.
Eske sala keteıik, Arys qalasyn qalpyna keltirýge baǵyttalǵan Jambyl oblysy ákimdiginiń shtabyna qarasty 3-sektorǵa 11 kóshe bekitilgen. Onda jeke turǵyn úılermen birge 14 áleýmettik jáne kommertsııalyq nysan bary anyqtalǵan.