Jambyldyq qolónershilerdiń buıymdary AQSh-taǵy kórmelerge qoıyldy

ASTANA. QazAqparat – Óńirlik kásipkerler palatasy Іsker áıelder keńesiniń tóraǵasy Aıgúl Aqshalova bastaǵan Jambyl oblysynyń delegatsııasy AQSh-qa baryp, ondaǵy kórmelerde qolóner buıymdaryn nazarǵa usyndy. Bul týraly QazAqparat Jambyl oblysy ákiminiń baspasóz qyzmetine silteme jasap habarlaıdy.

Delegatsııa Chıkago qalasynda ótken Naýryz meıramyna arnalǵan merekelik is-sharaǵa qatysty. Ony Qazaq Community Center Chicago qazaq dıasporasynyń ókilderi uıymdastyrdy. Sonymen qatar, isker áıelder Hıýston, Nıý-Iork pen Maıamıde boldy.

«AQSh-taǵy Naýryz meıramy oıdaǵydaı ótti. Qazaq dıasporasy bir-birimen jaqynyraq tanysyp, jerlesterin qoldap otyrýǵa, odan ári yntymaqtastyq týraly memorandýmdar jasasqany qýantty. Olardy dúnıejúzilik qolónershiler qalalarynyń tizimine engen Taraz qalasy týraly aqparattar qyzyqtyrdy. Bizdiń tarıhı shahar týraly kóbirek bilgisi keledi.

Joǵary qarjylyq shyǵyndardy eskere otyryp, isker áıelder bizdiń qolónershilerimizdiń ónimderin ótkizý múmkindigi jáne baılanys ornatý úshin barlyq shyǵyndardy óz moınyna aldy.

Jambyldyq sheberlerdiń buıymdary qazaq dıasporasynyń ǵana emes, shtattardyń ózge de turǵyndarynyń qyzyǵýshylyǵyn oıatty. Olar ózderine unaǵan ónimderdi satyp alyp jatty.

Sondaı-aq, Qazaqstannyń AQSh-taǵy konsýldyǵynyń ókilderimen kezdesip, delegatsııamyzdyń maqsaty týraly áńgimeledik», - dedi Aıgúl Aqshalova.

Merekelik sharalar barysynda jambyldyqtar dombyra tartýdan sheberlik sabaǵyn ótkizip, halyq ánderin shyrqady.