Jambyldyq dárigerler memlekettik nagradalarmen marapattaldy

TARAZ. QazAqparat – Jambyl oblysynyń ákimi Berdibek Saparbaev beınekonferentsııa baılanys rejıminde astana kúnine oraı memlekettik medaldarmen jáne tósbelgilermen marapattalǵan medıtsına qyzmetkerlerimen kezdesti, dep habarlaıdy QazAqparat tilshisi.

Berdibek Saparbaev medıtsına qyzmetkerlerine koronavırýs pandemııasymen kúrestegi adal jáne qajyrly eńbekteri úshin alǵys bildirdi.

«Medıtsına qyzmetkerleriniń biliktiligi men tájirıbesi, tabandylyǵy olarǵa óz kásibin qoǵamdaǵy eń bedeldi mamandyqtardyń biri etýge múmkindik beredi. Sizderdiń asa jaýapkershilikke toly mindetterińiz shydamdylyq pen túsinistikke negizdelgen. Júrekterińiz ben júzderińiz sheksiz meıirim men jylylýlyq toly. Koronavırýs pandemııasyna baılanysty sizder men barsha áriptesterińizdiń jumys júktemesi eselenip, shuǵyl rejımde eńbek etýdesizder. Gıppokrat antyna adaldyq tanytqandaryńyz úshin sizderge tek alǵys aıtamyz!» - dedi aımaq basshysy.

Sondaı-aq, Berdibek Saparbaev barshany astana kúnimen quttyqtady.

Basqosýda 10 medıtsına qyzmetkeri memlekettik ordenmen, medalmen jáne Alǵys hatpen marapattaldy.

Atap aıtsaq, «Parasat» ordenimen oblystyq kópbeıindi balalar aýrýhanasynyń dáriger-epıdemıologi Gúlfaıra Myrzabekova, «Qurmet» ordenimen oblystyq kópsalaly balalar aýrýhanasynyń ınfektsıonıst dárigeri Elena Pak marapattaldy. Al, «Ereń eńbegi úshin» medaline juqtyrylǵan ımmýn tapshylyǵy sındromynyń aldyn alý jáne onymen kúres júrgizý jónindegi oblystyq ortalyqtyń ınfektsıonıst dárigeri Gúlnara Baıdáýletova, oblystyq kópbeıindi balalar aýrýhanasynyń ınfektsıonıst dárigeri Eleýsiz Qaıyńbaev, oblystyq medıtsınalyq jedel stansasynyń aýdandar boıynsha aǵa feldsheri Marına Ovachenko, oblystyq mamandandyrylǵan ońaltý ortalyǵynyń bas medbıkesi Farıda Úsenbaeva ıe boldy.

Sondaı-aq, «Shapaǵat» medali ǵylymı-klınıkalyq kardıohırýrgııa jáne transplantologııa ortalyǵynyń reanımatolog dárigeri Almas Álibekov, oblystyq kópbeıindi balalar aýrýhanasynyń epıdemıology Bekbolat Keńesbaevqa tabystaldy. QR Qurmet gramotasymen ǵylymı-klınıkalyq kardıohırýrgııa jáne transplantologııa ortalyǵynyń reanımatologi Dáýren Narbaev, oblystyq kópbeıindi balalar aýrýhanasynyń ınfektsıonısi Lıza Týrganova marapattaldy.

«Medıtsına qyzmetkerleri eshqashan qoldaý men nazardan tys qalǵan emes. Bizdiń jumysymyzdy baǵalaǵandaryńyzǵa úlken rahmet! Búginde búkil álem qaýipti vırýspen kúresýde. Kúndiz-túni ter tógip jatqan áriptesterime alǵys aıtqym keledi. Olardy eshqandaı qıyndyqtar men qaýip-qaterlerge boı bermeýde. Dárigerler naýqastardyń jaǵdaıyn jeńildetý úshin qoldan kelgenniń bárin jasap jatyr dep senimdi túrde aıta alamyn», - dedi Elena Pak.

Ol osy múmkindikti paıdalana otyryp, turǵyndardy karantın rejımi men barlyq sanıtarlyq talaptardy saqtaýǵa shaqyrdy. Elena Pak koronavırýspen aýyryp jazylǵandardy qazirgi naýqastardyń ómiri men densaýlyǵyn saqtaý úshin qan donory bolýǵa shaqyrdy.