Jambyldan kelgen qarbyzdan zııankester shyqty

ASTANA. QazAqparat - Astanalyq ınspektorlar Jambyl oblysynan kelgen qarbyzdan qaýyn shybynyn tapty. Búgin atalǵan ónimdi arnaıy ádispen joıý sharalary atqaryldy, dep xabarlaıdy QazAqparat tilshisi.

Astana qalasy boıynsha aýmaqtyq ınspektsııasy basshysynyń orynbasary Symbat Qalıasqarovtyń aıtýynsha, bir partııada 10 tonna boldy. Sonyń ishinde 150 kelige jýyq qarbyzdan «qaýyn shybyny» degen zııankester shyqty.

«Biz onyń bárin tárkilep aldyq. Atalǵan fakti boıynsha ákimshilik quqyq buzýshylyq aktisi rásimdeldi. Endi, qarbyzdyń ıesi 20 aılyq eseptik kórsetkish, ıaǵnı 48 100 teńge kóleminde aıyppul tóleıdi», - deıdi S.Qalıasqarov.

Mamannyń sózine qaraǵanda, qaýyn shybyny asqabaq tuqymdas ónimder - qarbyz, qaýyn men qııarǵa jıi túsedi. Ondaıda sary shybyndar pispeı turǵan qarbyzǵa qurt salyp ketedi. «Qarbyzdyń syrtynda qyzyl-qońyr izder paıda bolady. Sodan qurttyń túskenin bilýge bolady. Ondaıdy kórseńiz birden ósimdikter karantıni boıynsha memlekettik ınspektorlarǵa aryzdaný qajet. Olar sol jerde júredi, nemese shaǵym túsirýge bolady. Negizi, onyń adam densaýlyǵyna zııany joq. Degenmen, basqa asqabaq tuqymdas ónimderge tarap ketse, bárin qurtyp jiberedi», - dep atap kórsetti S.Qalıasqarov.
  

Aıta keteıik, bıyl qaýyn shybyny Astanada alǵash ret anyqtalyp otyr. Inspektorlar qarbyzdyń bárin arnaıy ádispen kómip tastady. «Jaqynda taǵy anyqtaldy. Sottyń sheshimi shyqqannan keıin ony da dál osylaı kómip tastaımyz», - deıdi S.Qalıasqarov.