Jambyldaǵy jarylys: Memleket basshysy sotqa deıingi tergeý amaldaryn muqııat júrgizýdi tapsyrdy
«Bas prokýratýra men Іshki ister mınıstrligine oqys oqıǵanyń mán-jaıyn jáne kinálilerdi anyqtaý úshin sotqa deıingi tergeý amaldarynyń muqııat júrgizýdi qamtamasyz etsin. Besinshi másele, Іshki ister mınıstrligi múddeli memlekettik organdarmen birlesip, qoǵamdyq tártipti, azamattardyń qaýipsizdigi men dúnıe-múlkiniń saqtalýyn qamtamasyz etý úshin keshendi sharalar qabyldasyn», - dedi ol Jambyl oblysyndaǵy tótenshe oqıǵa boıynsha ótken shuǵyl jınalysta.
Sondaı-aq, Qasym-Jomart Toqaev quzyrly organdardy tótenshe jaǵdaı týraly jalǵan aqparattyń taralýyna jol bermeýdi mindettedi.
«Altynshy másele, Ulttyq qaýipsizdik komıteti, Bas prokýratýra, Іshki ister mınıstrligi men múddeli memlekettik organdarǵa oqıǵa týraly jalǵan aqparattyń taralýyna jol bermeý úshin sharalar qabyldasyn», – dedi Prezıdent.
Aıta keteıik, 26 tamyz kúni saǵat 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, jarylys boldy.