Jambyldaǵy «Qaralma» taý-shańǵy kesheni bıyl paıdalanýǵa beriledi

TARAZ. QazAqparat – Jambyl oblysy Jýaly aýdanyndaǵy «Qaralma» taý-shańǵy bazasynda biraz ýaqyttan beri saıabyrsyp qalǵan qurylys jumystary qaıta qarqyn aldy, - dep habarlaıdy QazAqparat tilshisi.

Jekemenshik ınvestor Meıirbek Júnisovtiń aıtýynsha, búginge deıin týrıstik obektige 4 mlrd. teńgeden astam jeke qarajat, ekinshi deńgeıli bankterdiń nesıe resýrstary men ózge de qarjy jumsalǵan.

Qazir munda negizgi qurylys jumystarynyń 90 protsenti atqarylǵan.

«Batys Eýropa-Batys Qytaı» halyqaralyq kólik dálizinen taý-shańǵy bazasyna deıin 8 shaqyrymǵa jýyq avtomobıl joly salynyp, elektr jelisi men jaryqtandyrý baǵandary ornatylǵan, gaz qubyry jetkizilgen.

Týrısterge arnalǵan meıramhana, servıstik ortalyq, bes mashınaǵa shaqtalǵan garaj, úlken jáne kishi arqanjoldar, syrǵanaý jolaqtarynyń qurylysy aıaqtalyp, kvartalishilik gaz qubyry men jaryqtandyrý jelisi tartylǵan.

- Ótken jyly «Bıznestiń jol kartasy-2025» memlekettik baǵdarlamasy aıasynda 488 mln teńgeniń nesıe qarajatyna qol jetkizilip, aýyzsý, káriz júıeleri, sý jınaqtaý orny, súzgileý-tazartý alańshalary salynyp, qoldanysqa berildi. Sońǵy eki jylda taý bókterinde qardyń tıisti mólsherden az túsýi eskerilip, qurylys jumystarynda azdap kidiris bolǵany ras. Sondyqtan mamandarmen keńese kele, munda sýdan jasandy qar jasaý qondyrǵysyn ornatý qajet dep sheshtik. Oǵan qosa qar atatyn zeńbirekter, ratrak alý qajet. Qurylysty tolyq aıaqtaý úshin qosymsha taǵy da 1 mlrd teńge qarajat qajet. Ony jekemenshik ınvestorlar men ekinshi deńgeıli bankterdiń nesıe resýrstary esebinen tabý qarastyrylady. Jasandy qar jasaý qondyrǵysyna jergilikti sý kózderimen qatar, paıdalanylǵan shaıyndy sýlardy qaıta óńdep, kádege asyrýdy da kózdep otyrmyz. Nysandy bıylǵy jyldyń sońyna qaraı paıdalanýǵa berý kózdelýde, - deıdi joba boıynsha seriktes «Tarazstroı-2004» JShS dırektory Qýat Baqqaraev.