Jambylda jyl basynan beri 78 oqýshy júkti bolyp qalǵan
Bul týraly «Nur Otan» partııasy janyndaǵy Balalardyń quqyqtaryn qorǵaý jónindegi respýblıkalyq keńestiń jumys tobynyń oblystaǵy keńeıtilgen otyrysynda aıtyldy.
Balalardyń quqyqtary men zańdy múddelerin qorǵaýdy qamtamasyz etý júıesin jetildirý boıynsha usynystardy zerdeleý jáne jınaý máselesi jónindegi jumys tobynyń kóshpeli keńesinde balalar quqyǵyn qorǵaý baǵytynda aımaqta atqarylyp jatqan jumystar sóz boldy
Mamandar óńirdegi jasóspirimderdiń júktiligi byltyrǵy jylmen salystyrǵanda tómendegeniń jetkizdi. Óıtkeni ótken jyly olardyń sany 258 jetti. Deni 16 men 17 jas aralyǵyndaǵy boıjetkender.
Jıynda Jambyl oblysyndaǵy kámelettik jasqa jetpegenderdiń densaýlyq ındeksi de jaqsarǵany aıtyldy.
«Nur Otan» partııasy janyndaǵy Balalardyń quqyqtaryn qorǵaý jónindegi respýblıkalyq keńestiń jumys tobynyń jetekshisi Rysty Jumabekova jumys toby balalarǵa eń qaýipsiz jáne qolaıly jaǵdaı jasaý máselelerin saraptaıtynyn alǵa tartty.
Balalardyń quqyqtaryn qorǵaý keńesiniń saraptamalyq toby búgingi tańda 11 óńirge baryp, olardyń árqaısysynda orta eseppen 11-13 aýdan jáne qalalardaǵy, shalǵaı aýyldardaǵy jaǵdaımen tanysyp, ár oblysta 90-ǵa deıingi áleýmettik nysan men balalar mekemeleriniń jumysyn zerttepti.
«Jambyl oblysynda jyl basynan beri 192 jasóspirim júkti bolǵan. Olardyń 78-i mektepte oqıtyn qyzdar. Balalar ómirine qatysty otbasy, mektep, mektepke deıingi mekemeler, kósheler, aýlalardy zerdeleı otyryp, biz «Baqytty otbasy» Jol kartasyna balalardyń qaýipsizdigin qamtamasyz etý úshin júıeli is-sharalardy usynamyz. Bul, birinshi kezekte balalar qaraýsyzdyǵy, sýıtsıdtiń jáne balalar qylmysynyń aldyn alý, sonymen qatar tıisti ınfraqurylymdy qamtamasyz etý men balalarǵa qaýipsiz jaǵdaı jasaý jónindegi is-sharalar», - dedi Rysty Maǵaýııaqyzy.
Jıynda jergilikti qurylym ókilderi óz usynystaryn aıtty.
«Nur Otan» partııasy janyndaǵy Balalardyń quqyqtaryn qorǵaý jónindegi respýblıkalyq keńes ókilderi munan keıin 4 topqa bólinip, Taraz qalasynda «Ana men bala» oblystyq ońaltý, oblystyq turmystyq zorlyq-zombylyq qurbandaryna áleýmettik kómek kórsetý ortalyqtary men sańyraý jáne nashar estıtin balalarǵa arnalǵan «Meıirim» arnaıy túzetý mektep-ınternaty sekildi nysandardy aralady.
Sonymen qatar, jumys toby birneshe baǵyt boıynsha Baızaq, Jambyl, Talas, Sarysý, Shý, Merki, Qordaı, Jýaly jáne T.Rysqulov aýdandaryn aralap, zerdeleý júrgizedi. Kóshpeli saraptamalyq toptyń jumys sapary aldaǵy kúnderi kórshiles Túrkistan oblysynda jalǵasady dep josparlanýda.