Jambylda jol salyp jatqan qytaılyq kompanııa jumysshylary narazylyqqa shyqty
Narazy eńbekkerlerdiń aıtýynsha, sońǵy úsh jyl boıy qytaılyq kompanııa eń tómengi jalaqy tólep kelgen.
Eńbek jaǵdaılaryn jaqsartýdy da talap etip otyrǵan 80-nen astam jumysshy jumysqa shyǵýdan bas tartqan.
«10 saǵattyq rejımde jumys isteımiz. Jalaqymyz oǵan tatymaıdy. Mundaı jaǵdaıǵa shydamaıtynymyzdy eki aıdan beri aıtyp júrmiz. Munda, tipti arnaıy kıim de joq», - deıdi jumysshy Mergenbaı Dabylov áriptesteriniń atynan sóz alyp.
Respýblıkalyq mańyzy bar tasjoldyń bul bóligin qytaılyq «Sınsın» kompanııasy salyp jatyr. Qurylys jumystary 2019 jyly bastalǵan desek, munda qazir 200-den astam jergilikti turǵyn jumyspen qamtyǵan. Kompanııa ókili jumysshylardyń aılyǵy 60 jáne120 myń teńge aralyǵynda ekenin aıtady.
«Biz jobany 2017 jylǵy baǵamen aldyq. Qazir ózimiz de shyǵynǵa batyp jatyrmyz. Qurylys zattarynyń quny da eselep ósti. Sol sebepti jalaqyny kótere almaı otyrmyz», – degen «Sınsın» qurylys jáne damytý kompanııasy» JShS bas ınjeneri Tsıýan Itsıýan máseleni 3 kún ishinde ózderiniń basshylyqtarymen aqyldasyp, kóretinderin jetkizdi.
Osyǵan oraı Jambyl oblysy ákiminiń orynbasary Nurjan Kalenderov kompanııa basshylyǵymen arnaıy kezdesken.
«Kompanııa basshylyǵy úsh kún ishinde qyzmetkerlerdiń jalaqysyn kóterý máselesi qaralatynyn aıtty», - deı kele ol jumysshylardy sabyrlyqqa shaqyrdy.
Aıta keteıik, «Merki – Býrylbaıtal» tas jolynyń qurylysy Jambyl oblysyndaǵy mańyzdy nysandardyń biri bolyp tabylady.
Qazirgi tańda qurylys jumystary shamamen 90 paıyzǵa aıaqtalǵan. Keler jylǵa deıin tolyǵymen aıaqtalyp, kólik qozǵalysy ashylady dep kútilýde.
Saıa SEMBAI