Jambylda jerdi paıdalaný kartasy ázirlenedi
Jıynda baıandama jasaǵan oblys ákimdigi jer qatynastary basqarmasynyń basshysy Baqtııar Kópbosynov «Jaıylymdar týraly» zańynda naqty mindetter kórsetilgenimen, keıbir aýyldyq okrýg ákimderiniń quqyqtyq normalardy jete túsinbeıtinin tilge tıek etti.
«Jaıylymdar týraly» zań talaptaryn júzege asyrý maqsatynda oblystyń barlyq aýdanynda jergilikti ókiletti jáne atqarýshy organdardyń birlesken sheshimimen jaıylymdardy paıdalaný jospary men shemasy bekitildi. Alaıda, taldaý barysy bul sharalar formaldy túrde júrgizilgendikten «Jaıylymdar týraly» zańnyń talaptary men normalary oryndalmaı otyrǵandyǵyn kórsetti. Bekitilgen jaıylymdar júktemesi normalarynyń saqtalmaýy eldi mekender mańyndaǵy jaıylym jerlerdiń jetispeýine jáne jerdiń tozýyna alyp kelýde», - deıdi basqarma basshysy.
Statıstıkalyq málimetterge sáıkes, 1 qańtarda oblys boıynsha 3,6 mıllıon bas tórt túlik tirkelgen. Basty másele turǵyndardyń barlyq maldy jyldyń tórt mezgilinde de aýylda ustaýy bolyp otyr. Osydan baryp eldi mekender mańyndaǵy jaıylymdardyń jetispeýshiligi týyndaýda.
Mal basyn shalǵaıdaǵy jaıylymdarǵa nemese orman qoryndaǵy jaıylymdarǵa shyǵarýdy úılestirý qajet. Jıynda osy másele boıynsha sóz alǵan oblys ákimdigi tabıǵı resýrstar jáne tabıǵat paıdalanýdy retteý basqarmasynyń basshysy Aslan Orazbekov memlekettik orman qorynyń jerin tıimdi paıdalanýdyń jaı-kúıine toqtaldy. Onyń aıtýynsha, qazirgi tańda 1859,8 myń gektar jerdiń 1 161,6 myń gektary ártúrli maqsatta paıdalanýǵa berilgen. Taǵy 698,3 myń gektar jerdi paıdalanýǵa múmkindik bar ekendigi týraly aýdan ákimdikterine arnaıy hat ta joldanypty.
Al, oblys ákimdigi jerlerdi paıdalaný jáne qorǵalýyn baqylaý basqarmasynyń basshysy Ábilqaıyr Tamabek jaıylymdardy tıimdi paıdalaný boıynsha zańnamaǵa ózgerister engizý qajettigin, ol boıynsha tıisti usynystar joldanǵanyn jetkizdi. Zańsyz berilgen 186 gektar jer jýyrda ǵana sot sheshimimen memleket menshigine qaıtarylsa, basqa da aýmaqtar boıynsha da sot protsesteri jalǵasýda.
Basqosýda oblys ákimi Berdibek Saparbaev jaıylym tapshylyǵyn joıý baǵytyndaǵy jumystarǵa kóńili tolmaıtynyn jetkizdi.
«Jer daýy qoǵamda burynnan ózekti máselege aınalǵan. Sonyń ishinde jaıylymnyń jaı-kúıine baılanysty men naqty tapsyrma bergen bolatynmyn. Bir jyldyń ishinde jumys óte tómen deńgeıde júrgizildi. Halyq osy jerdiń arqasynda malyn ósirip, eginin egip otyr. Al ony biz tolyqqandy qamtamasyz ete almasaq, ne bolmaq?
Aldaǵy 1 shildege deıin jer paıdalaný boıynsha zerdeleý jumysyn aıaqtaý qajet. Bul turǵyda meniń jaýapty orynbasarlarym, tıisti basqarmalar aýdan ákimdikterimen birlesip, halyqqa keń kólemde aqparat berý kerek. Ásirese sharýa qojalyqtary tolyq eskertken jón. Kim mal ustamaıdy, onyń jeri qaıtarylýy tıis. Endi jer mal basyna baılanysty bólinetin bolady. Sosyn tórt túlik úı aýlasyna syımaı jatsa, jaılaýǵa shyǵarǵan abzal», - dedi aımaq basshysy.
Kelesi kezekte tıisti mınıstrlikterdiń buıryqtaryn negizge ala otyryp, aımaqtyq normatıvterdi daıyndaý kerek. Bul qujat oblystyq máslıhattyń sessııasynda bekitilmek. Ol úshin taldaýlar durys júrgizilýi qajet.
«Bárin tereń zertteı kele, Jambyl oblysynyń jer paıdalaný kartasyn jasaımyz. Sonyń ishinde bárin qamtıtyn bolamyz. Qaı jer ıgerilýde? Qaı jer bos jatyr? Bul turǵyda tsıfrlandyrý júıesiniń múmkindigin paıdalanyp, elektrondy bazaǵa engizý qajet. Áıtpese jýyrda T.Rysqulov aýdany, Tereńózek aýylynda oryn alǵan jer daýy basqa aımaqtarda da qaıtalanýy múmkin. Biz mundaı túıtkilge jol bermeýimiz kerek», - dedi Berdibek Saparbaev.