Jambylda úsh jyl ishinde 15 myńnan astam ustaz arnaıy kýrstan ótken
Kezdesý barysynda óńir basshysy Elbasy Joldaýyndaǵy bilim sapasyn arttyrýǵa arnalǵan mindettemelerdiń oblys boıynsha oryndalý barysyna toqtalyp ótti.
Búginde oblystaǵy barlyq mektepterdiń 1,2,3,5,6,7,8 synyptary Nazarbaev zııatkerlik mektepteriniń baǵdarlamasyna sáıkes jańartylǵan bilim berý mazmunyna kóshti. Ondaǵy ozyq tájirıbeni taratý maqsatynda óńirdegi 40 bilim mekemesi bazalyq alań retinde jumys atqarýda. Bul oraıda úsh jyldyń ishinde 15840 muǵalim arnaıy kýrstan ótken. Bilim berýdiń jańartylǵan mazmunyna kóshken ustazdardyń jalaqysy 30 paıyzǵa ósken. Ol úshin aǵymdaǵy jyly respýblıkalyq bıýdjet esebinen 3 mıllıard 540 mıllıon 799 myń teńge bólingen.
Aıta keteıik, jańa baǵytta bilim berýge ádistemelik qoldaý kórsetý maqsatynda oblystyq bilim basqarmasy, pedagogıkalyq sheberlik ortalyǵy, Taraz qalasyndaǵy Nazarbaev mektebimen birikken jospar qurylǵan. Sondaı-aq, oblystyq oqý ádistemelik kabıneti men Taraz qalasyndaǵy Nazarbaev Zııatkerlik mektebi ózara kelisimshart jasasqan.
Kúlásh Shámshıdınova óz sózinde búgingi urpaqqa bilim jolynda kóptegen talaptar qoıylyp otyrǵanyn, olarǵa zamanaýı, jańasha mazmunda bilim berilý kerektigin basa aıtty. Jıyn sońynda Asqar Isabekuly men Kúlásh Noǵataıqyzy, Kúlásh Noǵataıqyzy men Taraz memlekettik pedogogıkalyq ýnıversıtetiniń rektory Erjan Ámirbekuly ózara yntymaqtastyqty damytý boıynsha arnaıy memorandýmǵa qol qoıdy.
Aıta ketý kerek, bilim berý mazmunyn jańartý - bilim berýdiń qazirgi zamanǵy úrdisterin jáne qazaqstandyq bilim berýdiń úzdik praktıkasyn kiriktirýge baǵyttalǵan. Bilim mazmunyn jańartý sheńberinde oqý baǵdarlamalaryn ázirleý kezinde qazaqstandyq pedagog-praktıkterdiń jáne ǵalymdardyń usynystary eskerildi. Munda oqytýdyń birneshe ádis-tásilderi qarastyrylǵan. Atap aıtqanda, qundylyqty-baǵdarlanǵan tásil, tulǵalyq-baǵdarlanǵan, júıelik-áreketti, komýmnıkatıvti, ıntegratıvti, zertteý jáne ınterbelsendi tásilder.
Ǵıbrat Sembaı