Jambylda urlanǵan kólikti aǵash arasyna jasyryp, Qyrǵyzstanǵa apara jatqan júrgizýshi ustaldy
19:51, 02 Maýsym 2020
TARAZ. QazAqparat – Jambyl oblysyndaǵy shekarashylar jeńil kólikti Qyrǵyzstanǵa ótkizbek bolǵan júrgizýshini ustady, dep habarlaıdy QazAqparat.
«2020 jyly 1 maýsymda «Aısha bıbi» (Jambyl oblysy) avtokólik ótkizý beketindegi shekarashylar urlanǵan «Mersedes-bents» jeńil kóligin Qyrǵyzstanǵa alyp ótpek bolǵandardyń jolyn kesti. Zańsyz shyǵarý úshin qylmysty uıymdastyrýshylar kólikti júk kóligine aramen kesilgen aǵashtardyń ortasyna jasyrǵan. Júrgizýshide kólik qujattary bolmaǵan», - dep habarlady Ulttyq qaýipsizdik komıtetiniń baspasóz qyzmeti.
Komıtettiń habarlaýynsha, tabylǵan jeńil kólik Jambyl oblysynyń Memlekettik kirister departamentine jiberildi.
«Bul – Aısha bıbi beketindegi kólikti jasyryn alyp ótpek bolǵan ekinshi oqıǵa. QR UQK Shekara qyzmetiniń aýmaqtyq bólimsheleri Qazaqstan aýmaǵynan kólikti zańsyz shyǵarýǵa jol bermeýge kóńil bóledi» delingen habarlamada.