Jambylda sý qubyrlarynyń 71 paıyzynyń tozyǵy jetken

TARAZ. QazAqparat – Jambyl oblysynyń ákimi Berdibek Saparbaev «Jambyl sý» MKK qyzmetkerlerimen kezdesip, kásiporyn basshysy Marat Smaıylovtyń esebin tyńdady, - dep habarlaıdy QazAqparat tilshisi.

Aımaq basshysy dırektordan kóptegen túıtkildi máseleler boıynsha saýaldarǵa jaýap berýin talap etti.

Kásiporyn 101 myńnan astam abonentke qyzmet kórsetedi, oǵan 649 shaqyrym sý qubyry, 249 shaqyrym káriz júıesi jáne 97 uńǵyma qaraıdy. Teńgeriminde 75 avtokóligi bar. Jyldyq aınalymy 1,8 mlrd. teńgeni quraıdy. Kásiporyn Eýropalyq Qaıta qurý jáne damý bankimen birlesip oblys ortalyǵynyń sýmen jabdyqtaý jelilerin jańǵyrtý boıynsha bir mıllıard teńgeniń aýqymdy jobasyn júzege asyrýda.

Sý qubyrlarynyń tozýy 71 paıyz, káriz jelileriniń tozýy 43 paıyzdy quraıdy. Kásiporynda 609 adam jumys isteıdi desek, olardyń ortasha jalaqy kórsetkishteri – 121,4 myń teńge.

Berdibek Saparbaev kásiporynnyń jumysyna kóńili tolmaıtynyn ashyp aıtty. Tutynýshylardyń sý shyǵynyn, kásiporynnyń óz qarjysyn esepke alý jáne baqylaý jumystary oń jolǵa qoıylmaǵan. «Jambyl sý» únemi bıýdjet qarjysyna ıek artpaı, qosymsha qarjylandyrý kózderin izdestirý kerek. Oblys ákiminiń orynbasary Ulan Jazylbekke jumys tobyn quryp, eki apta ishinde EQQDB qarajatynyń tıimdi jumsalýyn egjeı-tegjeıli zerdeleý tapsyryldy. Nátıjesi boıynsha tıisti sharalar qabyldanatyn bolady. Budan bólek, atalǵan másele taıaýda oblys ákimdiginiń apparattyq keńesteriniń biriniń negizgi taqyrybyna aınalmaq.

Kelesi másele retinde jalpyúılik jáne jeke esepteý quraldaryn ornatý jaıy da nazarǵa alyndy. Mundaı qondyrǵymen barlyq úıler men páterler túgeldeı qamtylmaǵan desek, sonyń saldarynan jyl saıynǵy sýdyń shyǵyn mólsheri 24 mıllıon tekshe metrge deıin jetýde.

«Ákimshilik-basqarýshylyq apparatta 50-deı qyzmetker jumys jasaıdy, al dırektordyń tórt orynbasary bar. Bul tym kóp emes pe? Sonymen qatar, káriz qaldyqtarymen jumys isteýge týra keletin qarapaıym jumysshylardyń jalaqysy úsh myń teńgege ǵana ósken... Sonymen qatar, ár páterde eseptegish quraldary bolýy tıis búgingideı kezde 70 kontroller ustaý asa kóp emes pe? Olarǵa jumsalǵan qarjyny tıimdi paıdalana otyryp, basqa baǵytta qoldanǵan durys shyǵar. Máselen, sol jalpyúılik jáne jeke sý eseptegishterin keńinen ornatylýyna baqylaýdy júzege asyrý kerek, - dedi aımaq basshysy.

Sondaı-aq, Berdibek Saparbaev apattyq jaǵdaılar jıi oryn alatyn qaraýsyz jelilerdi teńgerimge alýǵa kóńil bóldi. Iesi joq bolǵandyqtan, olar baqylaýsyz qalýda.

Kezdesýdi qorytyndylaı kele Berdibek Saparbaev kásiporyndaǵy baqylaý men esep júrgizý jumystarynyń álsizdigin taǵy da atap ótti. Sý qubyrlaryn aýystyrýdyń orta merzimdi josparyn jasaýdy, qaraýsyz qubyr ıelerin anyqtaýdy tapsyrdy. Qajet bolǵan jaǵdaıda, máseleni sot arqyly sheshý júkteldi. Tutynýshylar sanyn arttyrý boıynsha jumysty kúsheıtý kerek. «Jambyl sý» MKK kelesi jyly jekeshelendiriletin kásiporyndar tizimine engen. Sondyqtan sý qyzmetkerleriniń qyzmeti qol jetimdi jáne ashyq bolýy úshin muqııat tekserý júrgizýdi qajet etetini basa aıtyldy.