Jambylda sheneýnikter kabınetin «tastap», aýyl-aýylda halyqtyń muń-muqtajyn tyńdady

TARAZ. QazAqparat –«Halyq únine qulaq asatyn memleket» tujyrymdamasy - halyq pen memleket arasyndaǵy yntymaqtastyq pen ózara baılanystyń negizi. Osy bastamany júzege asyrý maqsatynda Jambyl oblysynda apta boıy qoǵamdyq qabyldaý ótti, dep habarlaıdy QazAqparat tilshisi.

Sheneýnikter jáne quqyq qorǵaý organdary oblys ortalyǵynda jáne shalǵaı aýyldarda kóshpeli qoǵamdyq qabyldaý ótkizdi.

Kezdesý barysynda turǵyndar tarapynan ózekti máseleler kóterildi. Birqatar túıindi túıtkilderdiń túıini sol sátte sheshimin tapty.

Aıtalyq, Taraz qalasynyń ákimi Aıtqazy Qarabalaev «Dos-Nar» saýda úıiniń aldynda qoǵamdyq qabyldaý uıymdastyrdy. Turǵyndar saǵat 10:00-den keshki beske deıin, shahar basshysynyń aldynda túrli máselelerdi kóterdi. Olardyń qatarynda abattandyrý, joldyń sapasy, kósheni jaryqpen qamtamasyz etý máseleleri boldy.

Máselen, Taraz qalasynyń turǵyny Ábdirahman Qalmahanov Radnıkov kóshesine asfalt tósep berýdi ótindi. Onyń aıtýynsha, atalǵan jol osy ýaqytqa deıin jóndeý kórmegen.

«Qazir kóshemizdegi sý qubyrlaryn aýystyryp jatyr. Asfalt bolmaǵandyqtan laı-batpaqty keshýge májbúrmiz. Bul jaǵdaı erte kúzde jańbyr jaýǵanda, qysta jıi qaıtalanady», - deıdi Á.Qalmahanov.

Qala ákimi atalǵan máseleni jyldyń sońyna deıin sheship berýge ýáde berdi.

Jýalylyqtar da ózderin ýaıymǵa salǵan máselelerin aýdan ákimine jetkizýge múmkindik aldy. Ol úshin Narbaı Ergebekov Qyzylaryq aýyldyq okrýgi ákimdiginiń aldynda qabyldaý ótkizdi. Eldi mekendi abattandyrý jumystarynyń bul jerde de ózektiligi baıqaldy. Sondaı-aq, sýarmaly sýmen qamtý, joldardy jóndeý, kóshelerdi jaryqtandyrý, jolaýshylar tasymaly jáne jerdi tıimdi paıdalaný boıynsha saýaldar kóterildi.

Qordaı aýdanynyń ákimi Rústem Dáýlettiń birinshi kezdesýi Qarakemer aýylynda ótip, turǵyndardy tolǵandyrǵan máseleler óz sheshimin tabatyn boldy.

Azamattardy qabyldaý kezinde jaýapty mamandar ótinishterdi qabyldap, memlekettik organdardyń jumysyna qatysty saýaldarǵa jaýap berdi. Jambyldyqtar halyq pen bılik arasyndaǵy bul baılanys túrine oń baǵa berdi.

«Pandemııa kezinde ákimdikke barýdy aıtpaǵanda, úıden, tipti dúkenge sırek shyǵatynmyn. Úıimniń mańynda qoǵamdyq qabyldaý ótetinen habardar bolyp, qýandym. Biz kórshilerimizben birge qol jınap, ákimdikke ótinishimizdi aparamyz dep josparlap otyrǵanbyz, izdegenge suraǵan ákimniń ózi keldi. Árıne, osy múmkindikti paıdalanyp, ótinishimizdi tikeleı ákimge jetkizdik», - deıdi zeınetker Ida Shadrına.

Pandemııaǵa baılanysty qoǵamdyq qabyldaý ashyq aspan astynda barlyq sanıtarlyq-epıdemıologııalyq talaptardy qatań saqtaı otyryp ótkizilgenin atap ótken jón.

Oblys ákiminiń bastamasymen aldaǵy ýaqytta osyndaı kóshpeli qoǵamdyq qabyldaýlar toqsan saıyn uıymdastyrylyp turmaq. Bul baǵyttaǵy alǵashqy kezdesý osy jyldyń maýsym aıynda ótken bolatyn.