Jambylda pılottyq jobaǵa bólingen 500 mln teńgege jýyq qarajat ıgerilmegen

TARAZ. QazAqparat – Aımaq basshysy Berdibek Saparbaev oblys turǵyndarynyń turmystyq tabysyn jaqsartýdyń pılottyq jobasyn júzege asyrýǵa basa mán berip otyr. Ol óziniń aýdandarǵa jasaǵan jumys saparynda da atalǵan jobanyń oryndalý jaıyna aıryqsha kóńil bólip, pılottyq okrýgterge mindetti túrde barady, dep habarlaıdy QazAqparat oblys ákimdiginiń resmı saıtyna silteme jasap.

Atalǵan joba apparattyq keńeste jan-jaqty saralandy. Sondaı-aq, basqosýda aýmaqtardy abattandyrý jáne sanıtarlyq tazalaý sharalary da nazarǵa alyndy.

Aýyl sharýashylyǵy basqarmasynyń basshysy Berik Nyǵmashevtiń aıtýynsha, pılottyq jobanyń bes baǵytynyń tórteýi tolyǵymen qarjylandyrylǵan. Búgingi tańda tek mal satyp alýǵa arnalǵan 500 mıllıon teńgege jýyq qarajat ıgerilmeı otyr. Ol bul jumystardyń bir apta ishinde aıaqtalatynyn aıtyp sendirdi.

Oblys ákimi qanatqaqty jobanyń aýyl turǵyndarynyń áleýmettik máselelerin sheshýge zor múmkindik beretinin atap ótti, alaıda ony uıymdastyrý jumystary ýaqytyly sheshimin tappaı otyrǵanyna qynjylys bildirdi.

- Qarajat tórt aı buryn bólingen, biraq biz áli de ony tolyq ıgere almaı otyrmyz. Jobanyń bolashaǵy bizdiń búgingi jumysymyzǵa baılanysty. Alǵashqy kezeń jemisti júzege asqan jaǵdaıda ǵana jobany odan ári qarjylandyrý sharalary jalǵasyn tabatyn bolady,- dep atap ótti aımaq basshysy.

Óńir basshysy usynylǵan málimetterdiń arasyndaǵy alshaqtyqty synǵa alyp, aýdandardyń eshqaısysy belgilengen merzim – 10 naýryzǵa deıin jumystardy tolyq aıaqtap úlgermegenin alǵa tartty.

Oblys ákimi aýyl sharýashylyǵy basqarmasy men aýdan ákimderine bir apta ishinde bólingen qarajattyń tıimdi ıgerilýin qamtamasyz etýdi tapsyrdy.

- Eger biz bólingen qarajatty utymdy uqsata almaıtyn bolsaq, jobaǵa qatysýshylardyń sany kóbeıgen kezde jumysty qalaı júrgizemiz? – dedi oblys ákimi.

Berdibek Saparbaev joba aıasynda túsindirý jumystaryn kúsheıtýdiń mańyzdylyǵyn, al qurylǵan kooperatıvterdiń qataryna usaq sharýa qojalyqtaryn tartý jáne olardyń agrarlyq sektordy damytýdyń lokomotıvi bolý kerektigin atap ótti. Sondaı-aq, bir ǵana shaǵyn oblysta 18 myńnan astam sharýa qojalyqtarynyń bolýy bul aýyl sharýashylyǵy sýbektileriniń usaqtalyp ketkendigin jáne saladaǵy jumystardyń álsizdigin ańǵartatyny aıtyldy.