Jambylda ozat shopan men jylqyshyǵa 15 mln teńgeden berildi

TARAZ. QazAqparat – QR Táýelsizdiginiń 30 jyldyǵy men eki márte Sotsıalıstik Eńbek Eri Jazylbek Qýanyshbaevtyń 125 jyldyǵyna oraı Jambyl oblysynda Qazaqstan malshylarynyń respýblıkalyq sleti ótti, dep habarlaıdy QazAqparat tilshisi.

Respýblıkalyq malshylar sleti aıasynda Tarazda «Aýyl sharýashylyǵy» skveriniń, danqty shopan beınelengen bareleftiń ashylýy, M.H.Dýlatı atyndaǵy Taraz óńirlik ýnıversıtetinde J.Qýanyshbaevqka arnalǵan birinshi respýblıkalyq ǵylymı-praktıkalyq konferentsııa ótti.

T.Rysqulov aýdanynda asyl tuqymdy aýyl sharýashylyǵy janýarlary men aýyl sharýashylyǵy tehnıkasynyń kórmesi ótti.

«Danqty shopan Jazylbek Qýanyshbaev soǵystan keıingi jańa ómirdiń qalyptasýyna ólsheýsiz úles qosty. Ol alǵashqylardyń biri bolyp qarakól qoıyn ósirýdi qolǵa aldy. Bıyl óńirde birqatar is-shara josparlanǵan. «Jalpaq jurttyń Jaz atasy» kitabynyń tusaýy kesildi», - dedi jıynda oblys ákimi Berdibek Saparbaev.

Kórmege asyl tuqymdy buqalar, jylqylar, golshteın-frız jáne shveıtsarııalyq sıyrlar, sondaı-aq jańa aýyl sharýashylyǵy tehnıkalary usynyldy.

Basqosý barysynda mal sharýashylyǵyn, agroónerkásip keshenin damytýdyń keń aýqymdy máseleleri, Qazaqstan Respýblıkasynyń agroónerkásiptik keshenin damytýdyń 2021-2025 jyldarǵa arnalǵan ulttyq jobasyn iske asyrý tetikteri talqylandy.

Aýyl sharýashylyǵy basqarmasynyń málimetinshe, búginde oblysta mal basy artýda, naqtyraq aıtsaq: iri qara sany – 10,7 paıyzǵa, usaq mal – 3,7 paıyzǵa, jylqy – 5,2 paıyzǵa, túıe – 7,5 paıyzǵa ósken.

Qonaqtarǵa arnalyp sport jáne mádenı sharalar uıymdastyryldy.

Kórme túrli nomınatsııalar boıynsha jeńimpazdardy saltanatty túrde marapattaý rásimimen túıindeldi. Sala ardagerleri Aýyl sharýashylyǵy mınıstrliginiń «Eńbek ardageri» jáne «Aýyl sharýashylyǵy salasynyń úzdigi» tósbelgilerimen marapattaldy.

«Mundaı deńgeıde malshylardyń sleti alǵash ret ótip otyr. Biz ózekti máselelerdi talqylaýǵa, tájirıbe almasýǵa múmkindik aldyq. Elimizdiń jáne oblys basshylyǵyna kórsetken qoldaýy men yqylasy úshin alǵysymyzdy bildiremiz», - dedi «Úzdik shopan» nomınatsııasyn jeńip alǵan T.Rysqulov aýdanynan kelgen Seıtbek Dúısenov.

Oblys ákimi Berdibek Saparbaev sharýa qojalyqtyń ozat shopany men jylqyshysyna 15 mıllıon teńge kóleminde sertıfıkat tabys etti. Bul qarjy olardyń otbasy úshin turǵyn úı salýǵa jumsalmaq. Sondaı-aq, aımaq basshysy «Jyly bulaq Merki» sharýa qojalyǵynyń shopanyna «Lada Vesta» avtokóliginiń kiltin tabystady.