Jambylda medıatorlar 700-ge jýyq janjal men daýly máseleni sheshken
Bul týraly oblystyq Qazaqstan halqy assambleıasy tóraǵasynyń orynbasary, hatshylyq meńgerýshisi Marjan Qojaeva aıtyp berdi.
«Medıatsııa kabınetine 773 azamat júginip, QHA medıatorlary 667 janjal men daýly jaǵdaılardy sheshti, olardyń negizgi túrleri – 33 eńbek, 396 azamattyq, 113 otbasylyq, 125 qylmystyq daýlar. Oblys boıynsha 2 medıatsııa kabıneti («Qoǵamdyq kelisim» KMM jáne Merki aýdanynyń Dostyq úıinde), sondaı-aq 40 medıatsııa alańy bar, onda QHA medıatorlary praktıkalyq jáne medıatıvtik kómek kórsetip, túsindirme júrgizedi»,- deıdi M.Qojaeva.
Esepti kezeńde mektep medıatsııasy boıynsha keń kólemdi 13 is-shara ótkizilip, onda 1840 adam qamtyldy. Al, «Otbasy jáne medıatsııa» áleýmettik jobasy boıynsha 14 otbasy tatýlasty.
«Oblystyq QHA Analar keńesi 7000 adamnyń qatysýymen 121 is-shara uıymdastyrdy. Etnomádenı birlestik jastary men jas analardyń qatysýymen otbasynyń róli týraly aqparattyq keńester ótkizildi. «Otbasy jáne medıatsııa» áleýmettik jobasy aıasynda otbasylyq sot boıynsha 21 otyrys ótkizilip, 14 otbasy ajyrasýdan aman qaldy. Joǵarǵy sottyń «Otbasylyq sot» pılottyq jobasy sheńberinde «Bastaý» jumys tobynyń 14 otyrysyna qatysyp, ajyrasýǵa kelgen 28 erli-zaıyptynyń máselesi qaraldy»,-deıdi hatshylyq meńgerýshisi.