Jambylda maska shyǵaratyn zaýyt 600 adamdy jumyspen qamtıdy

TARAZ. QazAqparat - «Super-Pharm» farmatsevtıkalyq zaýyty tolyq óndiristik qýatyna shyqqan kezde 600 adamdy jumyspen qamtamasyz etedi, dep habarlaıdy QazAqparat Indýstrııa jáne ınfraqurylymdyq damý mınıstrligine silteme jasap.

Jambyl oblysyndaǵy «Super-Pharm» farmatsevtıkalyq zaýyty 2011 jyldyń jeltoqsan aıynda údemeli ındýstrııalyq-ınnovatsııalyq damý baǵdarlamasy aıasynda ashylǵan, búginde kásiporyn otandyq medıtsınalyq mekemelerdi bir rettik ónimmen turaqty qamtamasyz etip otyr.

Óndiris oshaǵy jylyna 15 mıllıonǵa deıin ónim shyǵarady.

Kásiporyn bir rettik medıtsınalyq buıymdar, hırýrgııa, akýsherlik, ortopedııa, gınekologııa úshin sterıldi jáne sterıldi emes jıyntyqtar, toqylmaǵan materıaldan jasalǵan jeke zattar (maska, bas kıim, bahıla, halat, aljapqysh, aqjaıma jáne basqa) shyǵarady.

Kompanııa ónimderiniń arasynda bulasyr buıymdar (leıkoplastyr, operatsııadan keıingi tańǵysh, kateterdi bekitýge arnalǵan tańǵysh), plastmassadan jasalǵan zattar jáne qan quıýǵa arnalǵan júıeler bar.