Jambylda qýaty 98 megavatt bolatyn tórt balamaly elektr stantsııasy salynady
Jambyl oblysynda jańartylatyn energııa kózderin damytýǵa barlyq jaǵdaı jasalýda.
Qazirdiń ózinde óńirde 13 balamaly energııa kózderi jumys isteıdi desek, olarmen elimizdegi kún, jel jáne sý arqyly alynatyn elektr energııasynyń 20 paıyzy qamtamasyz etiledi.
Bul turǵyda óńirdiń áleýeti zor jáne ony tolyq kólemde paıdalaný qajet.
Kezekti apparattyq keńeste oblys ákimi Berdibek Saparbaev osylaı dedi.
«Balamaly energııa kózderin damytý boıynsha jumystar oıdaǵydaı júrip jatyr, oǵan klımattyq jaǵdaıymyz da qolaıly. Osy oraıdaǵy elimiz boıynsha eń joǵarǵy kórsetkish bizge tıesili. Sondyqtan jumysty jalǵastyra otyryp, túrli nusqalardy qarastyryp, ınvestorlar tartý qajet. Balamaly energetıka – bul strategııalyq mańyzdy baǵyt, ony damytý Elbasy Nursultan Nazarbaevtyń tapsyrmasyna sáıkes júrgizilip jatqanyn eske salǵym keledi», - dep atap ótti oblys ákimi.
Oblys ákimdiginiń energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, aldaǵy eki jylda jalpy qýaty 98,2 megavatt bolatyn jańartylǵan energııa kózderiniń taǵy tórt nysanyn iske qosý josparlanǵan.
«Jańatas pen Qarataýda eki jel elektr stantsııasy, Kóksaı ózeninde jáne Tasótkel sý qoımasynda eki sý elektr stantsııasy salynady. Osylaısha, 2022 jylǵa qaraı jańartylǵan energııa kózderi nysandarynan alynatyn energııanyń jalpy kólemi 430,6 megavatty quraıdy», - dedi basqarma basshysy.
Sondaı-aq, Q.Qorǵanbaev 2023-2025 jyldarǵa josparlanǵan tórt joba týraly aıtyp berdi.
Olar – Merki ózenindegi sý elektr stantsııasy, Jambyl aýdanyndaǵy kún elektr stantsııasy jáne Talas pen Shý aýdandaryndaǵy eki jel elektr stantsııasy.
Bul elektr stantsııalarynyń jalpy qýaty 177,5 megavatty, al ınvestıtsııa kólemi – 80 mıllıard teńgeni quraıdy.
Oblys ákimi energetıka jáne turǵyn úı-kommýnaldyq sharýashylyq basqarmasynyń basshysyna aýdandar boıynsha balamaly energııa kózderin damytý kartasyn ázirleýdi tapsyrdy.
«Biz jańartylǵan energııa kózderi nysandaryn salý úshin qaı jerde jáne qandaı múmkindikter bar ekenin naqty bilýimiz kerek. Meniń oıymsha, barlyq aýdanda olardy salýǵa múmkindik bar. Bizde oblystyń energetıkalyq áleýetin iske asyrýdyń aýqymdy jospary bolýy tıis», - dedi óńir basshysy.
Óńirdiń balamaly energııa kózderin damytý kartasy bir aıdan keıin usynylýy tıis.
Ony ázirleýmen oblys ákimdiginiń energetıka jáne turǵyn úı-kommýnaldyq sharýashylyq jáne jer qatynastary basqarmalary aınalysady.