Jambylda kópbalaly otbasylardyń úıine órtten qorǵaıtyn qondyrǵy ornatylýda

TARAZ. QazAqparat – Jambyl oblysynda gaz ben tútin ıisi shyqqanda iske qosylyp, jamandyqtyń aldyn alatyn qondyrǵylar ornatylyp jatyr, dep habarlaıdy QazAqparat tilshisi.

Atalǵan qondyrǵymen búgingi kúnge deıin kópbalaly jáne áleýmettik jaǵdaıy tómen 1700-den astam otbasy qamtamasyz etildi. Olar – Taraz qalasy, Jýaly jáne Talas aýdandarynyń turǵyndary.

Mamandar bul qurylǵylardyń órttiń aldyn alýǵa múmkindik beretinin aıtady. Aıtalyq, kógildir otynnyń ıisi shyqsa nemese ot tutansa, dabyl iske qosylady. Mundaı qurylǵy áleýmettik az qamtylǵan 29 myńǵa jýyq otbasynyń úıine ornatylady.

«Qutqarýshy mamandar qysqy jylytý maýsymy bastalǵan kezeńnen bastap órtke qarsy sharalardy kúsheıtý maqsatynda 55 myńǵa jýyq turǵynǵa túsindirme jumystaryn júrgizip, arnaıy paraqshalar taratyp shyǵady»,- deıdi oblystyq tótenshe jaǵdaılar departamentiniń bas mamany Qaırat Orazbaev.

Aıta keteıik, jyl basynan beri oblys aýmaǵynda jylytý maýsymy kezinde ıis tııý boıynsha 8 oqıǵa tirkeldi. 561 órt tirkelgen. Saldarynan úsh adam qaza týyp, 4 adam zardap shekti.