Jambylda kásipkerden para alǵan sheneýnikke 4 mln teńge aıyppul salyndy
12:57, 13 Aqpan 2020
NUR-SULTAN. QazAqparat – Jambyl oblysynda ákim apparatynyń arnaıy bazasynyń burynǵy basshysy sottaldy. Bul týraly QR Sybaılas jemqorlyqqa qarsy is-qımyl agenttigi Birinshi deparatmentiniń aǵa tergeýshisi Danııar Bekaıdarov aıtty, dep habarlaıdy QazAqparat tilshisi.
«Sybaılas jemqorlyqqa qarsy qyzmet «Jambyl oblysy ákimi apparatynyń arnaıy bazasy» MM burynǵy basshysy Qaraǵulovqa qatysty sotqa deıingi tergeýdi aıaqtady. Ol áskerge shaqyrylǵandardy ystyq tamaqpen qamtý boıynsha memlekettik satyp alý kelisimsharttaryn bekitýge jáne jalpy qamqorlyǵy úshin jeke kásipkerden 350 myń teńge kóleminde para aldy degen kúdikke ilindi», - dedi aǵa tergeýshi agenttiktiń baspasóz ortalyǵynda ótken brıfıngte.
2020 jyldyń 11 aqpanynda Taraz qalalyq sotynyń úkimimen Qaraǵulovqa 4 mln 200 myń teńge aıyppul salynyp, memlekettik qyzmette laýazymdy oryndarda jumys isteý quqyǵynan ómir boıyna aıyryldy.