Jambylda kanadalyq kompanııa kannabıs maıyn óndirmek
Bul týraly oblys ákimi Asqar Myrzahmetovtiń tóraǵalyǵymen ótken keńeste aıtyldy. Atalmysh basqosýda kanadalyq kompanııa ókilderi Jambyl oblysynda kannabıs maıyn óndiretin jobany júzege asyrýǵa nıetti ekendikterin jetkizdi. Bul maı medıtsınalyq baǵytta obyr, býyn, ókpe, kóz, epıleptsııa sekildi kóptegen aýrýlarǵa taptyrmas emdik qasıetke ıe.
Kompanııanyń baqylaý keńesiniń múshesi Abýladze Konstantın myrzanyń aıtýynsha, zaýyt qaldyqsyz tehnologııa júıesine negizdelmek. Negizgi ónimnen qalǵan qaldyqtan qaǵaz, mata, bıootyn shyǵarý kózdelýde. Al, ónim Evropa, Kanada, Qytaıǵa eksporttalmaq. Alǵashqy kezeńde 500 tonna, ekinshi kezeńde 1000 tonna, ýaqyt óte 5000 tonnaǵa deıin qara sorany ıgerýge kúsh salmaq. Kompanııa ókilderi eger kelisim bolsa zaýyt qurylysyn aldaǵy úsh jylda tolyǵymen aıaqtap, jumysty bastaýǵa bolatynyn aıtty.
Asqar Myrzahmetov jobany qoldaýǵa daıyn ekenin, alaıda zaýyt negizinen esirtkisiz ónim óndirýge baǵyttalýy tıistigin basa aıtty. Ol úshin aldymen halyqaralyq uıymdardyń arnaıy ruqsatyn alý - jumysty júıeleı túsýge múmkindik bermek. Osyny eskergen óńir basshysy kompanııa ókilderinen ónim óndirý tehnologııasyn, ónim quramy týraly tolyq túsinik berýdi talap etti. Sondaı-aq, jumystar aıaqsyz qalyp nemese nátıjesiz bolmaý úshin arnaıy ekijaqty memorandým jasasýdy usyndy. Ol memorandýmda taraptardyń mindetteri men talaptary naqty belgilenbek.
Aıta keteıik, oblys ákimi joba júzege asqan jaǵdaıda negizgi jumys kúshin jergilikti turǵyndardan tartý kerektigine de jiti kóńil bóldi. Usynysqa qaraı qajetti mamandardy daıyndaýǵa jergilikti bılik barynsha atsalysatynyn jetkizdi.