Jambylda ınternet-alaıaqtarmen kúreske baǵyttalǵan «CyberPol» pılottyq jobasy iske qosyldy

ASTANA. QazAqparat – Ótken apta ishinde Jambyl oblysynda ınternet-alaıaqtyqpen kúrestiń jańa jobasy «CyberPol» iske qosyldy, dep habarlaıdy QazAqparat tilshisi.

«Baǵdarlamanyń basty maqsaty - tsıfrlyq tehnologııalar salasyndaǵy qylmystarǵa qarsy is-qımyl, basqasha aıtqanda, ınternet-alaıaqtyqqa qarsy kúres. «CyberPol» tobynyń quramyna tergeýshiler, jedel ýákilder jáne krımınalıst-mamandar kiredi. Arnaıy bólinistiń jumysy eki negizgi baǵyt boıynsha júrgiziledi: halyq arasyndaǵy aqparattyq-túsindirý jumystary jáne árbir qylmystyq is sheńberinde jedel-izdestirý is-sharalarynyń tolyqtyǵyn qamtamasyz etý. Bıyl óńirdegi kıberpolıtsııa qyzmetkerleri 28 kásibı alaıaqty ustady. Olardyń 16-sy basqa oblystardyń turǵyndary», - dep toqtaldy onlaın-brıfıngi barysynda ІІM ókili Shuǵyla Turlybek.

Vedomstvo málimetinshe, bıyl 6 aıda Jambyl oblysynyń aýmaǵynda ınternet alaıaqtyqtyń 90 deregi tirkelgen. Bul byltyr sáıkes kezeńde anyqtalǵan qylmystarǵa qarǵanda 40,8%-ǵa az.

Osyǵan deıin elimizde bir aptada 3 myńǵa jýyq qylmys jasalǵany habarlandy.