Jambylda erikti jastar muqtaj otbasyna úı salyp berdi

TARAZ. QazAqparat – Jambyl oblysynyń ákimi Berdibek Saparbaevtyń bastamasymen qolǵa alynǵan «Asarlatyp úı salý» jobasy aıasynda Turar Rysqulov aýdanyny Lýgovoı aýylynda taǵy bir baspananyń kilti tabystaldy,-dep habarlaıdy QazAqparat tilshisi.

Turǵyn úıdiń qurylysyna erikti jastardan qurylǵan «Jan jylýy» qaıyrymdylyq qorymen qatar, jergilikti kásipkerler, sharýa qojalyqtary jáne de qarapaıym aýyl turǵyndary úles qosqan.

«Asarlatyp úı salý» jobasymen aýdanda ótken jyly josparlanǵan 16 úıdiń 14-i salynǵan. 2 daıyn úı satyp alynyp, muqtaj otbasylarǵa tapsyrylǵan bolatyn. Bıyl taǵy da 15 úıdiń qurylysy júrgizilip jatyr. Bul joly joba aıasynda demeýshilerdiń kómegimen Lýgovoı aýylynyń turǵyny, erekshe bala tárbıelep otyrǵan Darııa Týlendıeva baspanaly boldy.

Qonystoı ıesin quttyqtaý úshin ıgi is-sharaǵa aýdan ákimi, ardagerler men qaıyrymdylyq sharasyna at salysqan jandar qatysty.

Baspana kiltin aýdandyq ardagerler keńesiniń tóraǵasy Qojaıhan Bıjanov tabystap, birlik bar jerde tirlik bar ekenin tilge tıek etip, asarlatyp úı salǵan aýyl turǵyndaryna alǵys aıtty.

Turǵyn úıdiń boı kóterýine aıryqsha úles qosqan aýyl azamattary men kásipkerlerdi aýdan ákimi Erbolat Sadyrqulov alǵys hattarmen marapattady.

Jańa baspananyń qurylysy 3 aıda aıaqtalǵan. 5 mıllıonǵa jýyq qarajat jumsalǵan. Aýyl kásipkerleri, syrttaǵy aýdan týmalary, erikti jastar men aýdannyń janashyr azamattarynyń demeýshilik kórsetýimen júzege asqan joba aldaǵy ýaqytta da óz jalǵasyn tappaq.