Jambylda bıýdjettiń 706 mln teńgesin jymqyrǵan kásipker sottaldy

TARAZ. QazAqparat - Halyqtyń ál-aýqatyn arttyryp, turmysyn jaqsartý - memlekettik retteýdiń mańyzdy aspektileriniń biri, sondyqtan Sybaılas jemqorlyqqa qarsy is-qımyl agenttigi bul máselege erekshe kóńil bólip otyr, dep habarlaıdy QazAqparat.

Sybaılas jemqorlyqqa qarsy is-qımyl agenttigi Jambyl oblysy boıynsha departamentiniń málimetinshe, taıaýda jambyldyq «Órken» JShS dırektory alty jylǵa sottalǵan. Ý. Músirálıev jalpy somasy 706 mln teńge bolatyn bıýdjet qarjysyn jymqyrǵan. Sonymen birge, ol qurylys salasynda jumys isteý quqyǵynan úsh jylǵa aıyryldy.

«Qoldy bolǵan qarajat «Taraz hımııalyq parki» erkin ekonomıkalyq aımaǵy basqarýshy kompanııasy» aýmaǵynda magıstraldy sý taratqysh salýǵa arnalǵan edi. Ondaǵy memlekettiń úlesi - 100 paıyz bolatyn. Kompanııa dırektory bıýdjet aqshasyn jymqyrý úshin memlekettik satyp alý kelisimi boıynsha atqarylǵan jumystyń aktilerine ótirik qol qoıyp otyrǵan. Al, halyqty sapaly aýyz sýmen qamtý - qazaqstandyqtardyń ál-aýqatyn kóterý jolyndaǵy asa mańyzdy áleýmettik baǵyttardyń biri», - dep atap ótti korrýptsııaǵa qarsy vedomstvodan.

Departament málimetinshe, memleketke kelgen shyǵyn tolyq ótelgen.

Eske sala keteıik, 2014 jyldan beri Jambyl oblysynda «Taraz» hımııalyq parki» arnaıy ekonomıkalyq aımaǵyn qurý jobasy iske asyrylýda. Osyǵan oraı, Prezıdent Qasym-Jomart Toqaev ónerkásiptiń múmkindigin tolyq paıdalanyp, ındýstrııalandyrý jobalaryn iske asyrýda zamanaýı tehnologııalyq óndiriske basa mán berý kerektigin aıtqan edi.

«Óńdeý ónerkásibine, ásirese, hımııa klasterine iri ınvestorlardy tartý qajet. Úkimet pen ákimdikke osy máseleni naqtylaýdy tapsyramyn. Bul - ekonomıkanyń ornyqty damýyna yqpal etedi, eńbek ónimdiligin arttyrady. Óńirdegi óndiristiń damý kózi «Taraz» hımııalyq parki» arnaıy ekonomıkalyq aımaǵy bolýy qajet», - dedi Qazaqstan Prezıdenti Jambyl oblysyna jumys sapary barysynda.