Jambylda bıyl taǵy 106 úı asarlatyp salynyp, muqtajdarǵa beriledi

TARAZ. QazAqparat - Jambyl oblysynda aǵymdaǵy jyly «Asarlatyp úı salý» jobasy aıasynda baspanaǵa muqtajdar úshin 106 turǵyn úıdiń qurylysy júredi, dep habarlaıdy QazAqparat.

Oblystyq qurylys basqarmasynyń málimetinshe, Taraz qalasynda - 10, Baızaq aýdanynda - 10, Jambyl aýdanynda - 8, Jýalyda - 10, Merkide - 10, Moıynqumda - 6, Qordaıda - 15, Sarysýda - 8, Talasta - 9, Shýda - 9, T.Rysqulov aýdanynda 11 úı salynady dep josparlanǵan.

Onyń ishinde 69 jańa qurylys, 24 kúrdeli jóndeý jáne 13-i satyp alý arqyly júzege aspaq.

Osyǵan oraı oblys ákimi Nurjan Nurjigitov 2020 jyly bastalǵan jobanyń negizgi tárbıelik mánin nazarda ustaý kerektigin basa aıtyp, jaýaptylarǵa naqty mindetter júktegen bolatyn.

«Asarlatyp úı salý» jobasynyń basty maqsaty - aýyl jurtshylyǵyn janashyrlyq pen birlikke jumyldyryp, sol arqyly jas urpaqqa ónege kórsete otyryp, áleýmettik osal toptaǵy, kópbalaly otbasylar men muqtaj jandarǵa úı soǵyp berý.

Jalpy, bul joba boıynsha 2020-2022 jyldar aralyǵynda 338 otbasy baspanamen qamtylǵan.

Naqtyraq aıtsaq, 2020 jyly - 99, 2021 jyly - 134, 2022 jyly - 105 úı tapsyrylǵan.