Jambylda bıyl 48 ınvestıtsııalyq joba júzege asady

TARAZ. QazAqparat – Jambyl oblysynda qańtar aıynda ınvestıtsııanyń jalpy kólemi 11,1 mıllıard teńgeni qurady. Bul ótken jyldyń sáıkes kezeńimen salystyrǵanda 6,5 paıyzǵa artyq, dep habarlaıdy QazAqparat tilshisi.

Oblys boıynsha ortasha kórsetkish oıdaǵydaı, degenmen aýdandardaǵy qalyptasqan jaǵdaıdy olaı baǵalaı almaımyz.

Oblystyq ákimdikte ótken jıyn barysynda kásipkerlik jáne ındýstrıaldy-ınnovatsııalyq damytý basqarmasynyń basshysy Aspandııar Seısebaev Qordaı, Jýaly, Baızaq aýdandary osy oraıdaǵy kórsetkish boıynsha artta qalyp otyrǵandardyń qatarynan ekenin ashyp aıtty.

«Ótken jyly ınvestıtsııanyń jalpy kólemi 344,1 mıllıard teńgeni qurap, bul 2019 jylǵa qaraǵanda 12,7 paıyzǵa artty. Bıylǵy kórsetkish te byltyrǵydan tómen bolmaýy úshin bizge aıanbaı jumys jasaýǵa týra keledi. Jyl endi bastaldy desek, bizde áli ýaqyt jetkilikti. Kóterme jáne bólshek saýda, taý-ken ónerkásibi, qurylys jáne qyzmet kórsetý salalarynda negizgi kapıtalǵa salynǵan ınvestıtsııalar kólemi tómen kúıinde qalyp otyr», - dedi A.Seısebaev.

Bıyl 544,2 mıllıard teńge kólemindegi 48 ınvestıtsııalyq jobany iske asyrý kózdelgen.

Jospar boıynsha jańa óndirister ashý, qoldanystaǵylardy jańǵyrtý sharalary josparlanýda.

«Ekinshi deńgeıli bankter men qarjy ınstıtýttary jelisi boıynsha ótken jyly shaǵyn jáne orta bıznes sýbektileri 85,6 mlrd teńge kóleminde qarjylyq qoldaýǵa ıe boldy, onyń 41 mlrd. teńgesi memlekettik baǵdarlamalar sheńberinde bólingen», - dedi A.Seısebaev.

Basqarma basshysy qolaıly ınvestıtsııalyq ahýal qalyptastyrý boıynsha elimizde júrgizilip jatqan keshendi jumys týraly da tilge tıek etti.

Ol Qazaqstanda ınvestıtsııalyq preferentsııalar jumys isteıtinin, jergilikti atqarýshy organdar jer ýchaskesin bólýge, ony ınfraqurylymmen qamtamasyz etýge kómektesetinine taǵy bir nazar aýdartty.

Sondaı-aq tehnologııalyq qurylǵylardy, materıaldar men shıkizatty ımporttaý kezinde ońaılatylǵan salyqtyq rejım bekitilgenine kóńil bólgizdi.

Oblys ákimi Berdibek Saparbaev sheteldik ınvestorlardy tartý úshin Qazaqstannyń basqa elderdegi elshilikterimen ózara tıimdi tyǵyz baılanys ornatý qajettigin atap ótti.

Elshilikterde jergilikti kásipkerler úshin konsýltatsııa uıymdastyrylady.

Onda Jambyl oblysynyń qaı salasy ınvestıtsııa quıý úshin daıyn ekendigi aıtylady.