Jambylda «Áýlıeata jastary» óńirlik baǵdarlamasy qabyldandy
Jaqynda ǵana oblystyq máslıhattyń sheshimimen qabyldanǵan bul baǵdarlamada 9 ındıkator qarastyrylǵan. «Áýlıeata jastary» degen ataýǵa ıe bolǵan baǵdarlama keler jyldyń alǵashqy kúninen bastap júzege asyryla bastaıdy.
«Jastar – qaı qoǵamnyń bolmasyn qozǵaýshy kúshi. Jastardy qoldaý, qamqorlyq tanytý jergilikti jerde de júıeli júrgizilgeni jón. Dál osy maqsatta oblysta 2021-2025 jyldarǵa arnalǵan memlekettik jastar saıasatyn iske asyrýdyń óńirlik baǵdarlamasy qabyldandy. Jalpy baǵdarlamada jastardy qoldaý, jumyspen, baspanamen qamtý tetikteri, úzdikterdi marapattaý, qajetti quqyqtyq keńes usyný, aqparattyq qoldaý bildirý syndy sharalardyń barlyǵy qamtylǵan. Máselen baǵdarlamanyń bir tarmaǵy óz salasynda tolaıym tabystarymen kózge túsken jastardy yntalandyrý sharalaryna arnalǵan. Bul baǵytta biz «Áýlıeata úmiti» oblys ákiminiń jastarǵa arnalǵan syıaqysyn jyl saıyn taǵaıyndaıtyn bolamyz. Baǵdarlamada bul syılyqty aldaǵy ýaqytta Taraz qalasy men aýdan ákimderi de taǵaıyndaý kerektigi aıtylǵan»,- deıdi oblys ákimdiginiń jastar saıasaty máseleleri basqarmasynyń basshysy Serikol Berikqoja.
Sonymen qatar, baǵdarlama aıasyna «Áýlıeata jastary» dep atalatyn ınternet-platforma qurylady. Bul platformaǵa «Áýlıeata úmiti» syılyǵynyń ıegerleri týraly málimetter de engiziletin bolady. Ondaǵy málimetter arqyly kez kelgen jeli qoldanýshysy úzdik jambyldyq jastar jaıynda bilip otyrmaq.
Basqarma basshysynyń aıtýynsha, jastardy baspanamen qamtý sharalary da bul baǵdarlamanyń eń basty ındıkatorlarynyń birine jatady. Bul ındıkatorlyq kórsetkishke qol jetkizý úshin 2022-2023 jyldary jas otbasylarǵa arnalǵan turǵyn úılerdiń qańqasyn ǵana turǵyzý bastamasy júzege asyryla bastaıdy dep kózdelýde. Sol arqyly páterdiń ózindik qunyn arzandatýǵa qol jetkizilmek.
«Bul turǵyn úılerden páter alǵan jastar onyń ishki árleý jumystaryn óz múmkindigine qaraı júrgize beredi. Tıisti memlekettik mekemelerge, kommertsııalyq uıymdarǵa osy jobany iske asyrýda áriptestik ornatýǵa usynys berildi»,-deıdi S.Berikqoja.