Jambylda áskerge alynatyn azamattardy irikteý bastaldy
Oblysta 2018 jyldyń 10 shildesinen bastap 28 qyrkúıegi aralyǵynda áskerge shaqyrylýshylardy zerdeleý jumystary bolady. Zerdeleý 2 kezeńnen turady. Birinshi kezeń - aldyn-ala irikteý úshin áskerge shaqyrylýshylardyń jeke isi tekseriledi jáne olardyń ata-analarymen, sondaı-aq ol jumys jasaıtyn nemese oqıtyn oqý oryndarynyń ókilderimen áńgimelesý júrgiziledi. Jeke áńgimelesý barysynda áskerge shaqyrylýshynyń moraldyq kelbeti, densaýlyq jaı-kúıi, dene daıyndyǵy, jalpy bilimi men arnaıy daıyndyǵy, otbasy jaǵdaıy anyqtalady. Áskerge shaqyrylýshylardyń jeke isin sapaly zerdeleý úshin Ulttyq qaýipsizdik komıteti men ishki ister organdarynyń, densaýlyq jáne halyqty áleýmettik qorǵaý organdarynyń ókilderi birlesip jumys júrgizedi.
Ekinshi kezeńde áskerge shaqyrylýshylar qalalyq jáne aýdandyq áskerı-medıtsınalyq komıssııadan ótedi. Sodan keıin Qarýly kúshterdiń qandaı túrine jáne áskerı bólimderge baratyny anyqtalady.
Áskerge shaqyrylýshylardy medıtsınalyq kýálandyrý tártibi jáne medıtsınalyq komıssııalardyń quramy Áskerı-dárigerlik saraptama júrgizý qaǵıdalaryna sáıkes aıqyndalady.