Jambylda áleýmettik nan baǵasyn 100 teńgeden asyrmaý mindetteldi

TARAZ. QazAqparat – Jambyl oblysynyń ákimi Nurjan Nurjigitovtiń tapsyrmasymen «Taraz» áleýmettik-kásipkerlik korporatsııasy áleýmettik nan pisiretin naýbaıhanalarǵa un satyp alyp jatyr, dep habarlaıdy QazAqparat tilshisi.

«Bıyl jergilikti naýbaıhanalar úshin aqpan-naýryzǵa 2 myń tonna un satyp alyndy. Turaqtandyrý qory 2,3 tonna undy áleýmettik nan shyǵaratyn naýbaıhanalarǵa kelisine 130 teńgeden jiberdi. Bul rette 2022-2023 jyldardaǵy áleýmettik mańyzy bar azyq-túlik taýarlary baǵasyn turaqtandyrý tetikterin iske asyrýdy qamtamasyz etý jónindegi komıssııanyń hattamalaryna sáıkes, saýda oryndaryna bir bólkeniń baǵasy 100 teńgeden aspaıtyn áleýmettik nan ótkizý mindetteldi», - dedi «Taraz» áleýmettik-kásipkerlik korporatsııasy» AQ óńirlik turaqtandyrý qoryn basqarý sektorynyń jetekshisi Arman Túımebaev ÓKQ-degi brıfıngide.

Spıkerdiń aıtýynsha, korporatsııadaǵy un qory búginde – 2 700 tonna, ıaǵnı naýbaıhana uıymdarynyń qajettiligin aldaǵy naýryz aıynyń sońyna deıin qamtamasyz etý úshin jetkilikti. Sondaı-aq, «Azyq-túlik kelisimshart korporatsııasy» UK» AQ qorynan taǵy 2 myń tonna una satyp alý josparlanyp otyr. Bul qajettilik týyndaǵan jaǵdaıda, mamyrdyń sońyna deıingi suranysty óteý úshin kózdelgen.

Arman Túımebaev atap ótkendeı, oblys turǵyndaryn azyq-túlikpen qamtamasyz etý maqsatynda jergilikti bıýdjetten bólingen 5,5 mlrd teńge óńirlik turaqtandyrý qoryn qalyptastyrýǵa baǵyttalyp otyr.