Jambylda 70 kópqabatty úı salynyp jatyr
«Asarlatyp úı salý» jobasy boıynsha jambyldyqtar 2020 jyldan beri kópbalaly jáne az qamtylǵan otbasylarǵa arnap 338 úı saldy. Al, bıyl 106 muqtaj otbasyn úımen qamtý josparlanǵan.
Jalpy, kezekte turǵandardy turǵyn úımen qamtamasyz etý maqsatynda byltyr 4208 páterli 68 kópqabatty úıdiń qurylysy qolǵa alynyp, onyń 2260 páterli 34 úıi paıdalanýǵa berildi.
«Bıyl «Qýatty aımaqtar – el damýynyń draıveri» jobasy aıasynda oblysta jalpy somasy 11,6 mıllıard teńgege 3689 páterlik 70 kópqabatty turǵyn úı salynyp jatyr. Jyl sońyna deıin 2564 páterlik 45 úıdi paıdalanýǵa berý josparda bar. Budan bólek, jeke ınvestıtsııa esebinen 435 páterlik 10 kópqabatty turǵyn úıdiń qurylysy da bastaldy.
Osy oraıda, az qamtylǵan otbasylardy turǵyn úımen qamtyp qana qoımaı, olardyń turaqty tabysynyń bar bolýyna da basa nazar aýdarýymyz kerek, – dedi turǵyn úı qurylysyna qatysty máseleler qaralǵan keńeste Jambyl oblysynyń ákimi Nurjan Nurjigitov.
Jalpy, bıyl oblysta 71 ınfraqurylymdyq jobany júzege asyrýǵa 8,4 mıllıard teńge bólingen. Joba júzege asqanda, kezekte turǵan azamattar jańa aýmaqtardan 869 jer telimin alatyn bolady.
Buǵan deıin biz Taraz qalasy eki aýmaqqa bólinedi dep jazǵan bolatynbyz.