Jambylda 43 jastaǵy almatylyqtyń kóliginen iri kólemde gashısh tabyldy
Jambyl oblysynda Esirtki qylmysyna qarsy is – qımyl basqarmasynyń qyzmetkerleri Shý-Qordaı avtojolynda Almaty qalasynyń 43 jastaǵy turǵynynyń basqarýyndaǵy «Shevrolet» markaly kóligin toqtatqan. Kólikti tekserý kezinde kapottyń astynan skotchpen oralǵan úsh túıinshek tabyldy, onyń ishinde jalpy salmaǵy 1 keli 880 gramm «gashısh» esirtki zaty bolǵan.
«Ustalǵan azamat kinásin moıyndap, Shý aýdanynyń ýaqytsha ustaý ızolıatoryna qamaldy. Qylmystyq kodekstiń 296-babynyń 4-bóligi (Asa iri mólsherde esirtki zattaryn zańsyz saqtaý) boıynsha sotqa deıingi tergeý amaly bastaldy. Atalǵan qylmysty jasaǵany úshin úsh jyldan jeti jylǵa deıin bas bostandyǵynan aıyrý jazasy kózdelgen», – dep habarlaıdy oblystyq Polıtsııa departamenti baspasóz qyzmetiniń basshysy Gúlsara Muhtarqulova.