Jambylda 42500 teńgelik áleýmettik kómek 161 myńnan astam azamatqa taǵaıyndaldy

TARAZ. QazAqparat – Jambyl oblysynda 42500 teńge mólsherindegi áleýmettik járdemaqy 161 myńnan astam azamatqa taǵaıyndaldy. Bul týraly oblys ákimi Berdibek Saparbaevtyń tóraǵalyǵymen ótken tótenshe jaǵdaı jónindegi jedel shtabtyń kezekti otyrysynda aıtyldy, dep habarlaıdy QazAqparat oblys ákimdiginiń resmı saıtyna silteme jasap.

Otyrysqa koronavırýstyq ınfektsııaǵa qarsy is–qımyl jónindegi respýblıkalyq jumys tobynyń músheleri - QR Prezıdenti Ákimshiliginiń memlekettik ınspektory Serik Qojanııazov, Densaýlyq saqtaý mınıstrligi asa qaýipti ınfektsııalardy epıdemıologııalyq qadaǵalaý basqarmasynyń basshysy Záýresh Jumadilova jáne ishki ister mınıstrligi Ákimshilik polıtsııa komıteti qoǵamdyq tártipti jáne jol qaýipsizdigin uıymdastyrý basqarmasy basshysynyń orynbasary, polıtsııa polkovnıgi Qanat Ýálıev qatysty.

Oblys ákiminiń birinshi orynbasary Bekbolat Orynbekov Jambyl oblysynda koronavırýsty ınfektsııaǵa qarsy júrgizilip jatqan jumystar týraly baıandady. Onyń aıtýynsha KVI-men aýyratyn naýqastardy emdeýge tartylǵan barlyq medıtsınalyq mekemeler, sondaı-aq karantındik statsıonarlar qajetti medıtsınalyq preparattarmen jáne jeke qorǵaný quraldarymen qamtamasyz etilgen.

Naýqastardy emdeýge tartylǵan medıtsına qyzmetkerlerine tıisti ústemeaqy jáne syıaqy tólenýde. Respýblıkalyq bıýdjetten jalpy somasy 40,1 mln.teńgege barlyq úsh táýekel tobyndaǵy 270 medıtsına qyzmetkeri materıaldyq kómekke qol jetkizgen. Jergilikti bıýdjetten shamamen 500 medıtsına qyzmetkeriniń eńbegin materıaldyq yntalandyrý máselesi qosymsha pysyqtalýda.

B.Orynbekov toblystyń barlyq dárihanalary qalypty rejımde jumys isteýde ekenin jetkizdi. Qaladaǵy dárihanalarda medıtsınalyq betperdeler 50 teńgeden satylýda. Ár adamǵa 5 danadan artyq berilmeıdi. 55 shaǵyn kásiporyndarda táýligine 80 myńnan astam betperde daıyndalýda. Antıseptıktermen qamtýda da kedergi joq. Kontrabandashylardan tárkilengen 9 tonna etıl spırtinen de antıseptıkter daıyndalýda.

Karantın kezeńinde tabysynan aıyrylǵan adamdar da nazardan tys qalmaǵan. 42500 teńge mólsherindegi áleýmettik járdemaqy 161 myńnan astam azamatqa tólendi. Ataýly áleýmettik kómek qarastyrylǵan otbasylarǵa azyq-túlik jıyntyǵy jetkizilmek. Sonymen qatar, az qamtylǵan azamattarǵa halyq kóp tutynatyn taýarlardy, sondaı-aq Kedendik baqylaý qyzmetteri tárkilegen taýarlardy úlestirý josparlanyp otyr.

Respýblıkalyq jumys tobynyń jetekshisi Serik Qojanııazov óńirde koronavırýstyq ınfektsııanyń taralýyna jol bermeý jónindegi oblystyq jedel shtabtyń jumysyn oń baǵalady.