Jambylda 4 aýyldyń ákimine jemqorlyq jasady degen aıyp taǵylyp otyr

TARAZ. QazAqparat - Jambyl oblystyq sybaılas jemqorlyqqa qarsy qyzmetiniń 6 aılyq jumysy qorytyndylandy, dep habarlaıdy QazAqparat.

Óńirlik kommýnıkatsııalar qyzmetinde Sybaılas jemqorlyqqa qarsy is-qımyl agenttigi Jambyl oblysy boıynsha departamentiniń basshysy Á. Áshirbaev 6 aılyq jumys jóninde esep berdi.

«2020 jyldyń 6 aıynda departament 73 qylmystyq isti tirkegen. Onyń ishinde aýyr sanatynda - 54, asa aýyr sanatynda - 1 jáne jedel jolmen 54 qylmys tirkelgen. Jasalǵan zańsyz is-áreketter úshin 49 tulǵa qylmystyq jaýapqa tartyldy. Mysaly, QR QK 189-babymen Jambyl oblysy ákimdiginiń kásipkerlik jáne ındýstrıaldy-ınnovatsııalyq damytý basqarmasynyń basshysy Sarıev 6,9 mln tenge kóleminde aıyppul jazasyna jáne atalǵan basqarmanyń bólim basshysy Bekseıtova 2 jyl 1 aı bas bostandyǵynan aıyrý jazasyna tartyldy» dep málim etti departament basshysy.

Sondaı-aq, QR QK 361-babynda qarastyrylǵan qylmysty jasaǵany úshin Moıynqum aýdany ákiminiń orynbasary Shalqarbekovtyń 1 jylǵa bas bostandyǵy shekteldi.

QR QK 366-babymen Jambyl oblysy ishki ister departamentiniń Shý aýdany polıtsııa bóliminiń kóshi-qon qyzmeti bólimshesiniń bastyǵy Abdıkalykovqa 7,5 mln teńge kóleminde aıyppul salyndy.

Jambylda oblystyq mándegi basshylarǵa qatysty - 5 is, qala men aýdan deńgeıinde - 5 basshy jáne 4 aýyl ákimine qatysty qylmystyq is qozǵalǵan.

67 qylmystyq is sotqa joldanǵan.