Jambylda 4,9 mlrd teńgeniń dári-dármegi patsıentterdiń qolyna tıgen
Sondaı-aq, Qazaqstanda tegin dári-dármek berý barysyn baqylaýdyń jańa túri paıda bolmaq. Jyl sońynda iske qosylatyn bul joba kepildendirilgen tegin medıtsınalyq kómek sheńberinde kórsetiletin qyzmetterge aqy tóleý protsesin jetildirýdi kózdeıdi.
«2018 jyldyń basynda Medıtsınalyq saqtandyrý qory kepildendirilgen tegin medıtsınalyq kómek paketi sheńberinde beriletin dári-dármek pen medıtsına buıymdaryna aqy tóleý tártibin ózgertti. ıAǵnı, buryn dári-dármek pen medıtsınalyq maqsattaǵy buıymdar aqysy dáriger jazǵan retsept boıynsha tólenip kelgen bolsa, bıyldan bastap dári qolma-qol berilgen retseptilerge ǵana tólenedi. Atap aıtqanda, patsıent dárini alǵan kezde tıisti qujattarǵa qol qoıady. Sodan keıin tólem týraly málimet «Dári-dármekpen qamtamasyz etý» aqparattyq júıesine engiziledi. Endigi kezeńde baqylaý júıesine patsıentterdiń ózderin tartý kózdelgen. Búgin biz osy júıeni nobaıly joba retinde iske qosyp otyrmyz», - dep túsindirdi «Áleýmettik medıtsınalyq saqtandyrý qory» KEAQ Jambyl oblysy boıynsha fılıalynyń dırektory Mavlıýda Bokaeva.
Dálirek aıtsaq, Densaýlyq saqtaý mınıstrligi, MSQ men «SK-Farmatsııa» JShS birlesip SMS-habarlama júıesin iske qosty. Joba sheńberinde patsıentterge 12 jeltoqsannan 2018 jyldyń sońyna deıin SMS-habarlama jiberý kózdelgen. Habarlama bıylǵy qarasha-jeltoqsan aılarynda tegin dári-dármek alǵandar tizimine engen patsıentterge jiberiledi. Jospar boıynsha, habarlama retseptilerde kórsetilgen 3 mln nómirge túsýi tıis.
Habarlamada dári-dármektiń berilgen kúni men ataýy kórsetiledi. Eger patsıent preparattardy almaǵan bolsa, SMS-habarlamaǵa jaýap retinde «0» tsıfryn joldaıdy nemese «SK-Farmatsııa» JShS-niń 1439 baılanys nómirine qońyraý shalýǵa bolady.
«Álbette, patsıentterdiń ambýlatorlyq kartalarynda kórsetilgen telefon nómirleri qate bolýy múmkin. Sol sebepti SMS-habarlamany bárine barady deý qıyn. Sondyqtan «SK-Farmatsııanyń» baılanys ortalyǵyna shaǵymdanýǵa bolatynyn eske salǵymyz keledi», - dedi M. Bokaeva.
Alynǵan málimetter saraptalyp, ár fakti jeke-jeke tekseriledi. Anyqtalǵan zań buzýshylyqtar QR Densaýlyq saqtaý mınıstrligi men Qoǵamdyq densaýlyq saqtaý komıtetine joldanady.
Habarlama nátıjesi men aqparattyq júıedegi málimetter arasynda aıtarlyqtaı alshaqtyq tabylyp jatsa, joba merzimi uzartylady. Sonymen qatar, bolashaqta ol kepildendirilgen tegin medıtsınalyq kómek sheńberinde kórsetiletin ózge de qyzmetterge qoldanylýy múmkin.
MSQ respýblıkalyq bıýdjetten qarjylandyrylatyn tegin medıtsınalyq kómek (TMKKK) paketiniń jáne jumys berýshiler, azamattar men memleket jarnasy esebinen qarjylandyrylatyn mindetti áleýmettik medıtsınalyq saqtandyrý (MÁMS) paketiniń operatory. TMKKK paketi sheńberinde kórsetilgen qyzmet aqysyn bıylǵy jyldyń basynan bastap Qor tólep keledi. Al, MÁMS paketi boıynsha qyzmet kórsetý 2020 jyly bastalmaq. Dári-dármek pen medıtsınalyq maqsattaǵy buıymdardy «SK-Farmatsııa» JShS satyp alady. «SK-Farmatsııa» dári men medıtsınalyq buıymdardy kelisimshart bekitken medıtsına uıymdarynan túsken ótinishter negizinde satyp alady.
Jalpy Qazaqstan boıynsha 2018 jyly MSQ men «SK-Farmatsııa» JShS arasynda 101,9 mlrd teńgege kelisim-shart bekitilgen bolatyn. Bıylǵy jyldyń 9 jeltoqsanyna deıin eldegi medıtsına uıymdary 101,9 mlrd teńgege retsept jazyp bergen. Sonyń ishinde, 74,6 mlrd teńgeniń dárisi patsıentter qolyna tıgen.